Aktori i njohur turk Can Yaman, i cili pritet të interpretojë “Sandokanin” e versionit modern, është liruar nga paraburgimi pasi u arrestua në Stamboll në kuadër të një operacioni policor kundër trafikimit dhe përdorimit të drogës në klubet e natës.
Arrestimi ndodhi të shtunën, më 10 janar, pas një informacioni në rrugë operative. Sipas mediave turke, Yaman u shoqërua për t’u marrë në pyetje dhe më pas u lirua në orët e pasdites, pasi dha dëshminë para hetuesve.
Në të njëjtin operacion policor u implikuan edhe figura të tjera të njohura të showbiz-it turk, përfshirë këngëtaren dhe aktoren Selen Görgüzel. Mes të arrestuarve janë gjithashtu Ceren Alper, modele e njohur në jetën mondane të Stambollit, si dhe Ayşe Sağlam, biznesmene e lidhur me menaxhimin e disa prej klubeve të bastisura në zonat Etiler dhe Beşiktaş.
Të shtatë personat e ndaluar iu nënshtruan testeve toksikologjike në Institutin e Mjekësisë Ligjore për të verifikuar nëse kishin konsumuar lëndë narkotike.
Policia turke bastisi gjithsej nëntë klube nate gjatë natës së operacionit, duke arrestuar edhe tregtarë droge dhe menaxherë lokalesh ku dyshohet se shpërndaheshin substanca narkotike.
Sipas gazetës Hurriyet, arrestimi i Can Yaman u bë pas një informacioni specifik që çoi hetuesit drejt tij.
Ngjarja ka shkaktuar reagime të shumta në rrjetet sociale, ku fansat e aktorit kanë shprehur zhgënjim dhe habi ndaj lajmit.
(Burimi: TGCOM / Hurriyet)
