Kate Moss ka përjetuar një transformim të jashtëzakonshëm – nga ikona e festave të shfrenuara të viteve ’90 në një simbol të stilit të jetesës së shëndetshme dhe mirëqenies. Dikur një nga fytyrat më të njohura të modës botërore, që mbulonte revistat më prestigjioze dhe pushtonte pasarelat e sfilatave më të mëdha, sot ajo duket më e re se kurrë në prag të 52-vjetorit të saj.
Karriera e supermodeles britanike nuk ka qenë gjithmonë e lehtë. Në vitin 2005 ajo u përball me skandalin e njohur si “Cocaine Kate”, pasi u fotografua pranë vijave të pluhurit të bardhë. Por pas vitesh të tëra feste, cigareje dhe alkooli, Kate ka ndryshuar rrënjësisht stilin e jetës së saj, duke ndërtuar një regjim të kujdesshëm shëndeti dhe bukurie gjatë tre dekadave në industrinë e modës.
Edhe pse ende shfaqet herë pas here në festa të miqve të famshëm, jeta e saj nuk ka asnjë ngjashmëri me periudhën e dikurshme të netëve pa fund. Gjatë viteve ajo ka vëzhguar nga afër profesionistët më të mirë të bukurisë dhe ka mësuar teknikat që e ndihmojnë të ruajë pamjen rinore.
Vetë Kate ka pranuar se ulja në karrigen e grimit në fillimet e karrierës së saj ishte një “shkollë e artë”, ku mësoi nga ekspertët më të mirë.
Sot, rutina e saj e mirëqenies përfshin “fasting” me lëngje dhe programin një javor vetëm me lëngje në resortin LifeCo në Turqi, të cilin e viziton çdo vit prej më shumë se një dekade. Ajo është gjithashtu pronare e markës së wellness-it Cosmoss, që ofron çajra, produkte për kujdesin e lëkurës dhe një libër me 150 mesazhe pozitive.
Në shtëpinë e saj ndodhet një pajisje Cadillac Pilates me vlerë rreth 4,000 paund dhe ajo stërvitet me trajneren personale Hortense Suleyman. Sipas një burimi për mediat, marka e saj Cosmoss tashmë shitet në Harrods dhe Kate ka pritshmëri të mëdha për suksesin e saj në tregun e mirëqenies.
Supermodelja ka ndarë shpesh me publikun edhe sekretet e saj të bukurisë. Ajo ka treguar se qëndron e hidratuar gjatë fluturimeve, konsumon ushqime të lehta dhe përshtatet shpejt me zonat kohore për të ruajtur energjinë. Kohët e fundit i është nënshtruar terapisë me dritë të kuqe LED dhe përdor pajisjen Talika Time Control+, të cilën e vlerëson për efektin në përmirësimin e lëkurës.
Në rutinën e saj përfshihen edhe mjetet gua sha prej kuarci rozë dhe nefriti, si dhe zhytja e fytyrës në ujë të ftohtë me feta kastraveci për të reduktuar ënjtjen. Ajo përdor gjithashtu vajin për fytyrën Cosmoss Golden Nectar për detoksifikim dhe kullim limfatik.
Një tjetër rregull i fortë i saj është shmangia e diellit, këshillë që ia ka dhënë më herët mikja e saj dhe artistja e grimit Charlotte Tilbury. Kate ka zbuluar gjithashtu se gjatë vitit bën pastrime me lëngje trejavore për të mbajtur trupin të freskët dhe plot energji.
Nga ikona e pasarelave dhe netëve pa fund, Kate Moss sot është shndërruar në një figurë që mishëron disiplinën, mirëqenien dhe bukurinë natyrale – një dëshmi se transformimi është i mundur, edhe pas një epoke të jetuar në ekstrem.
(Burimi: Daily Mail)
