Mund të duket paradoksale që një avokate divorcesh flet për mënyrën si të shpëtosh martesën. Por Ayesha Vardag, e njohur në Britani si “Divorce Diva”, thotë se pas viteve të tëra në gjykata dhe nё zyrë me çifte që ndahen, ka zbuluar një të vërtetë të thjeshtë: intimiteti është çelësi për të qëndruar bashkë.
Sipas saj, mungesa e seksit dhe e lidhjes fizike është një nga arsyet më të zakonshme që çon drejt ndarjes. “Njerëzit kanë nevojë për atë afërsi, për atë lidhje. Trupi ynë ka nevojë për hormonet e lumturisë si dopamina dhe oksitocina që çlirohen gjatë seksit”, shprehet ajo.
Studime të ndryshme e mbështesin këtë ide. Hulumtime daneze kanë treguar se 47% e personave të divorcuar së fundmi përmendin mungesën e dashurisë ose intimitetit si faktor kyç në dështimin e martesës.
“Edhe kur s’keni qejf, bëjeni”
Mesazhi i saj është i drejtpërdrejtë: edhe nëse jeni të lodhur nga puna, fëmijët apo rutina, mos e lini seksin të zhduket nga marrëdhënia. “Është si palestra – s’ke qejf të shkosh, por kur je atje, zakonisht ndihesh më mirë,” thotë ajo.
Sipas Vardag, shumë çifte që i drejtohen për divorc ankohen pikërisht për zhdukjen e intimitetit. Në disa raste, përpjekjet për të rikthyer afrimitetin – nga një darkё romantike e deri te pak më shumë kujdes për veten – kanë ndihmuar në pajtim.
Ajo thekson se seksi nuk duhet parë si diçka mekanike apo e mërzitshme, por si një pjesë qendrore e marrëdhënies. Kur lidhja fizike është e fortë, çiftet e kanë më të lehtë të përballojnë problemet e tjera.
Kujdesi për veten nuk është luks
Një tjetër këshillë e saj lidhet me pamjen dhe vetëvlerësimin. Sipas Vardag, në marrëdhëniet afatgjata shpesh ndodh që partnerët ndalojnë së bëri përpjekje për t’u dukur mirë për njëri-tjetrin.
Ajo nxit si gratë ashtu edhe burrat të mos “rehatohen” në rutinë. “Mos u bëni thjesht figura të lodhura në divan. Përpiquni të jeni tërheqës, të vëmendshëm dhe argëtues,” thotë ajo, duke shtuar se kjo nuk ka të bëjë vetëm me partnerin, por edhe me vetëbesimin personal.
Pse martesa ftohet?
Sipas avokates, modeli është i përsëritur: dy persona bien në dashuri, martohen, vijnë fëmijët, shtohen përgjegjësitë dhe lodhja. Marrëdhënia si çift kalon në plan të dytë.
Stresi, mungesa e kohës dhe komunikimi i reduktuar krijojnë distancë emocionale. Më pas, një lidhje jashtëmartesore shpesh nuk është shkaku, por simptoma e kësaj distance.
“Tradhtia rrallë është arsyeja kryesore e divorcit. Ajo është shenjë që lidhja është dobësuar prej kohësh,” shprehet ajo.
Një këshillë për momentet e tensionit
Për çiftet që zihen shpesh, Vardag sugjeron një ushtrim të thjeshtë: ndaloni, merrni frymë thellë dhe mbani duart e njëri-tjetrit duke u parë në sy.
“Mund të duket sentimentale, por ka efekt fiziologjik. Të ndihmon të dalësh nga spiralja e zemërimit,” thotë ajo.
Megjithëse profesioni e bёn tё merret me ndarjet, Vardag pranon se i pëlqen kur çiftet pajtohen. Sipas saj, sekreti nuk është të rikrijosh pasionin e ditëve të para, por të kujtosh kush ishe kur partneri u dashurua me ty – dhe ta mbash gjallë atë version.
Në fund, shton ajo, nëse nuk gjeni kohë për njëri-tjetrin, dikush tjetër mund ta bëjë.
(Burimi: The Sun)
