Regjisori i njohur Sam Raimi, i cili ka lënë gjurmë në kinemanë botërore me filma si Spider-Man dhe The Evil Dead, rikthehet në ekran me një projekt tërësisht origjinal dhe intrigues: “Send Help”, një thriller psikologjik me tone të errëta dhe humor të zi, që do të shfaqet në kinema më 30 janar 2026.
Filmi ndjek historinë e Linda Liddle (Rachel McAdams) dhe Bradley Preston (Dylan O’Brien) – dy kolegë pune që mbijetojnë pas një aksidenti ajror dhe gjenden të izoluar në një ishull të shkretë. Aty, përballë natyrës së pamëshirshme dhe plagëve të së kaluarës, ata detyrohen të bashkëpunojnë për të mbijetuar.
Por ajo që nis si një aleancë e brishtë shndërrohet shpejt në një luftë psikologjike plot tension, manipulim dhe instinkt mbijetese, ku kufiri midis ndihmës dhe shkatërrimit bëhet gjithnjë e më i paqartë.
“Kam gjithmonë një dobësi për historitë ku personazhet dinamikë testohen deri në ekstrem,” – thotë Raimi. “Në këtë film, balanca e fuqisë midis tyre ndryshon vazhdimisht, duke krijuar një situatë që shpërthen në surpriza dhe tension.”
Krahas McAdams dhe O’Brien, në film luajnë edhe Edyll Ismail (La Brea), Dennis Haysbert (Far from Heaven), Xavier Samuel (Elvis), Chris Pang (Crazy Rich Asians), Thaneth Warakulnukroh (Thai Cave Rescue) dhe Emma Raimi (Happy Pills).
Filmi është prodhuar nga Sam Raimi dhe Zainab Azizi (65), ndërsa Damian Shannon dhe Mark Swift (Friday the 13th, Baywatch) kanë shkruar skenarin. Muzika origjinale mban firmën e legjendarit Danny Elfman, kompozitorit të njohur për kolonat zanore të The Nightmare Before Christmas dhe Batman.
“Send Help” pritet të jetë një nga premierat më të komentuara të fillimvitit 2026 — një histori që kombinon suspensin klasik të Raimit me humorin e errët dhe përmbysjet që e kanë bërë emrin e tij sinonim të kinemasë së tensionit dhe ironisë.
