Qeveria e Senegalit ka paraqitur në parlament një projektligj që dyfishon dënimet për marrëdhëniet mes personave të të njëjtit seks, duke i bërë ato të dënueshme me nga pesë deri në 10 vite burg. Nisma u prezantua nga kryeministri Ousmane Sonko, në një klimë të tensionuar, mes arrestimesh dhe një vale mesazhesh homofobike në rrjetet sociale.
Aktualisht, legjislacioni senegalez parashikon dënime nga një deri në pesë vite burg për ato që Kodi Penal i cilëson si “akte kundër natyrës”. Me ndryshimet e reja, ky kufi do të rritet ndjeshëm. Sipas kryeministrit, çdo akt seksual mes dy personave të të njëjtit seks do të përkufizohet qartazi si “akt kundër natyrës” dhe do të ndëshkohet me burgim nga pesë deri në 10 vite.
Projektligji përfshin edhe dispozita të tjera, përfshirë dënime nga tre deri në shtatë vite burg për këdo që “bën propagandë” në favor të marrëdhënieve mes personave të të njëjtit seks. Njëkohësisht, parashikohen masa ndëshkuese edhe për ata që akuzojnë dikë për marrëdhënie të tilla “pa prova”.
Lëvizja vjen pas një serie arrestimesh. Policia njoftoi këtë muaj ndalimin e 12 burrave, mes tyre dy figura të njohura publike dhe një gazetar. Mediat vendase raportojnë se numri i të arrestuarve në javët e fundit ka arritur në rreth 30 persona.
Çështja e të drejtave LGBTQ ka qenë prej kohësh temë e debatit në Senegal, ku grupe fetare kanë organizuar protesta për dënime më të ashpra, ndërsa mbrojtësit e të drejtave të njeriut paralajmërojnë për shkelje serioze të lirive themelore. Organizata Human Rights Watch ka shprehur shqetësim për përshkallëzimin e arrestimeve dhe për rrezikun ndaj personave që jetojnë me HIV/AIDS, duke i bërë thirrje autoriteteve të respektojnë angazhimet ndërkombëtare për mbrojtjen e të drejtave të njeriut.
Projektligji trajton gjithashtu çështje që lidhen me abuzimin seksual të të miturve. Sipas kryeministrit, nëse aktet e ndaluara kryhen ndaj një të mituri, do të aplikohet dënimi maksimal.
Data e votimit në Asamblenë Kombëtare ende nuk është shpallur, por nisma ka ndezur një debat të fortë brenda dhe jashtë vendit për drejtimin që po merr politika penale në Senegal.
(Burimi: France 24 me AFP)
