Senegali është kampioni i ri i Kupës së Kombeve të Afrikës, duke mposhtur Marokun organizator me rezultatin 1-0 në një finale dramatike që do të mbahet mend jo vetëm për golin vendimtar, por edhe për kaosin që pushtoi stadiumin. Pape Gueye u kthye në heroin e mbrëmjes, duke shënuar në kohën shtesë dhe duke i dhënë “Luanëve të Terangës” trofeun kontinental për herë të dytë në histori.
Finalja u vendos pas një fundi të çmendur të kohës së rregullt. Senegalit iu anulua një gol që dukej i rregullt, ndërsa menjëherë më pas arbitri akordoi një penallti të diskutueshme për Marokun. Ky vendim ndezi revoltën e lojtarëve senegalezë, të cilët u larguan nga fusha në shenjë proteste. Situata doli jashtë kontrollit: pati përleshje mes lojtarëve rezervë të të dyja skuadrave, tifozë senegalezë u përpoqën të futeshin në fushë dhe një prej tyre hodhi edhe një karrige, ndërsa policia formoi një kordon sigurie për të rikthyer qetësinë.
Pas një ndërprerjeje prej 14 minutash, ndeshja rifilloi. Portieri Édouard Mendy u shndërrua në shpëtimtar duke pritur penalltinë e Brahim Díaz, në goditjen e fundit të kohës së rregullt. Në minutën e katërt të kohës shtesë, Pape Gueye goditi me të majtën dhe e dërgoi topin në këndin e sipërm të portës, duke shpërthyer festën senegaleze.
Koha shtesë u luajt nën masa të rrepta sigurie, me rreshta policie të vendosur përballë sektorit të tifozëve senegalezë, ndërsa stadiumi mbetej në tension të vazhdueshëm. Megjithatë, Senegali ruajti avantazhin dhe kur ra bilbili i fundit, trofeu mori rrugën drejt Dakarit.
Kjo është fitorja e dytë e Senegalit në Kupën e Kombeve të Afrikës, pas suksesit të vitit 2021, kur triumfuan ndaj Egjiptit me penallti. Këtë herë, historia u shkrua mes emocioneve, polemikave dhe një finaleje që do të kujtohet gjatë në futbollin afrikan.
(Burimi: CNN)
