Mbrëmë në Kiev të Ukrainës, Agjencia anti-korrupsion e Ukrainës ekuivalente me BKH-në shqiptare, ushtroi kontroll në shtëpinë e shefit të kabinetit të Presidentit Volodymyr Zelenskiy, Andriy Yermak, i cili është dhe një nga njerëzit më të fuqishëm dhe më të afërt të Zelenskit.
Ky kontroll i befasishëm përshkallëzon në ekstrem një krizë të madhe politike në qeverisjen e Ukrainës, në ditët kur Zelenski po përballet me një presion të jashtëzakonshëm nga Uashingtoni dhe Moska për të pranuar kushtet e përcaktuara për një marrëveshje paqeje.
Andriy Yermak, i cili është edhe kryesuesi i ekipit negociator të Ukrainës, i cili është vënë në pozicionin që të pranojë kushtet e draft-marrëveshjes së vënë në tavolinë dhe propozuar nga Uashingtoni sipas kërkesave ruse, konfirmoi se apartamenti i tij po kontrollohej dhe se ai po bashkëpunonte plotësisht me autoritetet ligjzbatuese.
Në një deklaratë të përbashkët, Byroja Kombëtare Kundër Korrupsionit e Ukrainës dhe Zyra e Prokurorit të Specializuar Kundër Korrupsionit thanë se kontrollet ishin “të autorizuara” dhe të lidhura me një hetim të paspecifikuar.
Më parë këtë muaj, dy agjencitë kundër korrupsionit njoftuan se po kryenin një hetim gjithëpërfshirës mbi një skemë të dyshuar ryshfeti prej 100 milionë dollarësh në kompaninë shtetërore të energjisë atomike që përfshinte ish-zyrtarë të lartë të qeverisë së presidentit dhe një ish-partner biznesi të Zelenskit.
Kontrolli i shtëpisë së Andriy Yermak mund të ndezë tensione të forta politike në Ukrainë, pikërisht në këtë moment delikat të saj.
54-vjeçari Andriy Yermak, është një mik i ngushtë i Zelenskit, që para se ky të bëhej “star” politik, dhe ishte shefi i fushatës së tij presidenciale të vitit 2019.
Yermak nuk është marrë si i pandehur ose si person nën hetim, por disa përfaqësues të opozitës në Ukrainë dhe disa anëtarë të partisë së Zelenskit kërkuan shkarkimin e tij, në çastet vendimtare të krizës së luftës në Ukrainë.
Kjo është një goditje e fortë ndaj Zelenskit që mund ta detyrojë atë të bëjë lëshime të dhimbshme për marrëveshjen ku falet toka e pushtuar e Ukrainës.
Duke folur për revistën The Atlantic këtë javë, Andriy Yermak tha se “askush nuk duhet të mbështetet te ne që do të heqim dorë nga territori”.
Analistët politik në Ukrainë e quajtën ngjarjen e djeshme në Kiev si “E Premtja e Zezë” për Yermakun dhe mikun e tij Zelenskiy, të cilit i ka mbetur në dorë vetëm një lëvizje: ta shkarkojë shefin e kabinetit dhe të caktojë një kryetar tjetër të ekipit negociator për arritur “Paqen në Ukrainë”.
