Shtetet e Bashkuara do të vendosin një tarifë prej 25% ndaj mallrave nga çdo vend që vazhdon të bëjë biznes me Iranin. Vendimi, që hyn në fuqi “menjëherë”, synon të rrisë presionin mbi Teheranin, ndërsa protestat antiqeveritare në Iran kanë hyrë në javën e tretë.
Trump e bëri njoftimin përmes rrjeteve sociale, pa sqaruar se çfarë përfshihet saktësisht në termin “të bërit biznes” me Iranin. Kina mbetet partneri më i madh tregtar i Iranit, e ndjekur nga Iraku, Emiratet e Bashkuara Arabe, Turqia dhe India — vende që potencialisht mund të preken nga masa e re.
“Çdo vend që bën biznes me Republikën Islamike të Iranit do të paguajë një tarifë prej 25% për çdo biznes që zhvillon me Shtetet e Bashkuara të Amerikës. Ky urdhër është përfundimtar,” shkroi Trump në platformën Truth Social.
Shtëpia e Bardhë nuk ka dhënë ende detaje shtesë mbi mënyrën e zbatimit të tarifave apo listën e importeve që do të goditen më fort.
Vendimi vjen në një klimë tensionesh të rritura. Trump ka paralajmëruar më herët se SHBA mund të ndërhyjë ushtarakisht nëse autoritetet iraniane vazhdojnë represionin ndaj protestuesve. Zëdhënësja e Shtëpisë së Bardhë, Karoline Leavitt, konfirmoi se opsionet ushtarake, përfshirë sulmet ajrore, “mbeten në tryezë”.
Ndërkohë, protestat në Iran shpërthyen pas rënies së fortë të monedhës vendase, rialit, dhe janë shndërruar në një krizë serioze për udhëheqjen e Ajatollah Ali Khamenei.
Situata në terren mbetet e paqartë për shkak të ndërprerjes së internetit që nga e enjtja mbrëma, gjë që e bën të vështirë verifikimin e informacionit. Mediat ndërkombëtare nuk kanë mundësi raportimi të drejtpërdrejtë nga brenda Iranit.
Trump deklaroi gjithashtu se zyrtarë iranianë kanë kërkuar negociata, por shtoi se “mund të na duhet të veprojmë para se të zhvillohet një takim”.
Ekonomia iraniane prej vitesh vuan nga sanksionet ndërkombëtare mbi programin bërthamor, të kombinuara me keqmenaxhim dhe korrupsion të brendshëm. Inflacioni ka kaluar 40%, ndërsa monedha vendase ka rënë në nivel rekord të ulët, duke rritur ndjeshëm çmimet e produkteve bazë si vaji i gatimit dhe mishi. Në fund të dhjetorit, edhe tregtarët e Teheranit dolën në protesta për të shprehur zemërimin ndaj krizës ekonomike.
(Burimi: BBC)
