Duket se gratë e forta të MAGA-s nuk po i qëndrojnë “fit” politikës së Trump dhe vetë atij që i zgjodhi me shumë bujë. Para pak ditësh shkarkoi Kristi Noem nga Homeland Security, sot Pam Bondin nga posti i prokurores së përgjithshme…
Duket se Trump priste më shumë nga Bondi për dosjet e Epstein, që dolën “në pazar” me shumë të dhëna. 1 milion herë është përmendur fjala “Trump” në dosjet që Bondi autorizoi të dilnin në publik, megjithëse u akuzua se nuk lejoi shumë të dhëna të dilnin në dritën e medias.
Lëvizja e fundit në administratën amerikane duket se lidhet drejtpërdrejt me menaxhimin e kësaj çështjeje tepër sensitive, e cila vazhdon të trazojë politikën dhe opinionin publik në SHBA. Publikimi i materialeve të lidhura me Jeffrey Epstein ka rikthyer në qendër të vëmendjes lidhje të mundshme, emra të njohur dhe presion të fortë mbi institucionet që kanë trajtuar dosjen.
Në vend të Bondit, Donald Trump ka emëruar si prokuror të përgjithshëm të përkohshëm zëvendësin e saj, Todd Blanche, një figurë që konsiderohet pranë rrethit të tij dhe me profil më të kontrollueshëm në një moment kaq të ndjeshëm.
Megjithatë, vetë Trump në një postim në rrjetin e tij Truth Social u përpoq ta paraqesë largimin si një tranzicion normal dhe jo si shkarkim.
Pam Bondi është një patriote e madhe amerikane dhe një mike besnike, e cila shërbeu me përkushtim si Prokurore e Përgjithshme gjatë vitit të kaluar. Pam bëri një punë të jashtëzakonshme në drejtimin e një goditjeje të madhe kundër krimit në të gjithë vendin tonë, duke bërë që vrasjet të bien në nivelin më të ulët që nga viti 1900. Ne e duam Pamin dhe ajo do të kalojë në një rol të ri, shumë të nevojshëm dhe të rëndësishëm në sektorin privat, i cili do të shpallet në një datë të afërt. Ndërkohë, Zëvendësprokurori i Përgjithshëm dhe një mendje shumë e talentuar dhe e respektuar në fushën ligjore, Todd Blanche, do të marrë detyrën si Prokuror i Përgjithshëm i komanduar. Faleminderit për vëmendjen tuaj ndaj kësaj çështjeje! Presidenti Donald J. Trump
Pavarësisht toneve lavdëruese, koha dhe konteksti i largimit ngrenë dyshime të forta se vendimi nuk është thjesht një “kalim në sektorin privat”, por një lëvizje e diktuar nga presioni politik dhe menaxhimi i një prej dosjeve më të rënda të viteve të fundit.
