Mjekësia kardiologjike hyn në një epokë të re: kolesteroli i lartë dhe obeziteti – dy nga faktorët më vdekjeprurës për zemrën – mund të kontrollohen më mirë falë terapive inovative që po rekomandohen gjithnjë e më gjerë nga specialistët. Shifrat flasin qartë: gjysma e atakeve kardiake ndodhin te njerëz që nuk kanë pasur kurrë një problem të mëparshëm të zemrës, çka i jep një tjetër urgjencë parandalimit. Pikërisht për këtë arsye, Kongresi i 86-të i Shoqërisë Italiane të Kardiologjisë rekomandon që trajtimet e reja të përdoren jo vetëm tek pacientët me histori sulmesh në zemër, por edhe tek ata që konsiderohen të rrezikuar, duke frenuar sëmundjen përpara se të godasë.
Mes zhvillimeve më të rëndësishme është një “super pilulë” e re për uljen e kolesterolit, version oral i frenuesve “Pcsk9”, të cilët deri më sot jepeshin me injeksion. Kjo pilulë e përdorur një herë në ditë synon të stabilizojë pllakat aterosklerotike dhe të ulë në mënyrë drastike rrezikun e një ataku akut. “Kolesteroli i keq është faktori më i madh i rrezikut edhe tek personat që nuk kanë pasur kurrë simptoma, por që nuk arrijnë t’i ulin nivelet me statina,” shpjegon kardiologu Ciro Indolfi.
Në të njëjtën kohë, ekspertët kërkojnë zgjerimin e rimbursimit për barnat e reja kundër obezitetit, të cilat kanë treguar efikasitet të lartë jo vetëm në uljen e peshës dhe parandalimin e diabetit, por edhe në mbrojtjen kardiovaskulare. Obeziteti, i cili po rritet me ritme alarmante, është tashmë përgjegjës për më shumë se 20,000 vdekje kardiovaskulare çdo vit vetëm në Itali dhe lidhet drejtpërdrejt me sëmundje si insufiҫienca kardiake, fibrilacioni atrial dhe goditjet në tru.
“Mbi 4 nga 10 italianë janë mbipeshë ose obezë, shpesh për vite me radhë, duke shtuar rrezikun e komplikimeve me çdo vit që kalon,” thotë Pasquale Perrone Filardi. Për këtë arsye, obeziteti po konsiderohet gjithnjë e më shumë si një objektiv specifik terapeutik, jo thjesht si problem estetik. Me terapitë e reja të kombinuara me statina dhe me barnat moderne kundër obezitetit, kardiologët besojnë se mund të shpëtohen mijëra jetë çdo vit.
(Burimi: ANSA)
