Fituesi i Çmimit Nobel për Letërsi, Wole Soyinka, ka deklaruar se viza e tij jorezidente për të hyrë në Shtetet e Bashkuara është refuzuar, dhe beson se arsyeja mund të jetë fakti që së fundmi ka kritikuar ish-presidentin amerikan Donald Trump.
Shkrimtari nigerian, 91 vjeç, i cili në vitin 1986 u bë i pari afrikan që fitoi Çmimin Nobel për Letërsi, foli të martën në një konferencë për shtyp në Lagos, ku tha se nuk e merr personalisht këtë vendim, por e sheh si pasojë të politikave të imigracionit të SHBA-së.
“Nuk ka të bëjë me mua. Nuk jam veçanërisht i interesuar të kthehem në Shtetet e Bashkuara,” tha ai. “Por ka një parim këtu: njerëzit duhet të trajtohen me dinjitet kudo që ndodhen.”
Soyinka, i cili ka dhënë mësim në universitete amerikane dhe ka pasur më parë një “green card”, tha me shaka se “green card-i im pati një aksident tetë vite më parë dhe ra mes një pale gërshërësh.” Në vitin 2017, ai shkatërroi publikisht “green card”-in e tij në shenjë proteste ndaj inaugurimit në detyrë të Trumpit.
Letra që ai mori nga autoritetet amerikane thoshte se viza e tij u revokua sepse “u bënë të disponueshme informacione shtesë pas lëshimit të saj”, pa dhënë ndonjë detaj tjetër mbi natyrën e atyre informacioneve.
Soyinka beson se arsyeja e mundshme lidhet me një koment të fundit, ku e kishte përshkruar Trumpin si “një version i bardhë i Idi Amin”, duke iu referuar diktatorit ugandez që sundoi vendin e tij nga viti 1971 deri më 1979.
Konsullata amerikane në Lagos i drejtoi të gjitha pyetjet te Departamenti i Shtetit në Uashington, i cili nuk dha menjëherë një përgjigje.
Duke e marrë me humor situatën, Soyinka e quajti letrën e revokimit “një letër dashurie” dhe tha se nuk ka ndërmend të aplikojë për vizë të re.“Nuk kam vizë,” tha ai me një buzëqeshje. “Nëse doni të më takoni, e dini ku të më gjeni.”
(Burimi: Associated Press / CNN)
