Policia e Shtetit ka bërë publik planin e masave për garantimin e rendit dhe sigurisë publike, në kuadër të ndeshjes ndërkombëtare të futbollit mes Shqipërisë dhe Anglisë, që do të zhvillohet sot, në orën 18:00, në stadiumin “Air Albania”.
Sipas njoftimit zyrtar, janë marrë masa të detajuara për shoqërimin dhe sigurinë e ekipit të Anglisë nga aeroporti i Rinasit drejt hotelit, stadiumit dhe kthimin e tyre. Gjithashtu, do të ketë shërbime të shtuara policore në të gjithë territorin e Tiranës para, gjatë dhe pas ndeshjes.
Kontrolle të rrepta dhe kufizime qarkullimi
Policia njofton se do të kryhen kontrolle të imtësishme të tifozëve para hyrjes në stadium, për të shmangur futjen e sendeve të rrezikshme, fishekzjarrëve, flakadanëve, lëndëve piroteknike, banderolave me përmbajtje raciste, por edhe objekteve të forta si monedha metalike, çakmakë, karikues dhe çadra.
Nga ora 14:00 deri në përfundim të ndeshjes, do të ketë bllokim trafiku në disa akse kryesore pranë stadiumit, përfshirë:
- Rruga “Papa Gjon Pali II”
- Rruga “Dervish Hima”
- Rruga “Asim Zeneli”
- Rruga “Themistokli Gërmenji”
- Rruga “Ismail Qemali”
- Rruga “Mustafa Matohiti”
- Rruga “Jul Variboba”
- Rruga “Lekë Dukagjini”
- Rruga “Avdyl Frashëri”
- Rruga “Skerdilajd Llagami”
- Rruga “Faik Konica”
Ndëshkimet ligjore
Policia rikujton se veprimet e dhunshme në stadium përbëjnë vepra penale. Hyrja në fushë pa autorizim dënohet me gjobë 50 000–100 000 lekë ose burg deri në tre muaj. Hedhja e objekteve të forta apo përdorimi i piroteknikës dënohet me burg nga 6 muaj deri në 3 vjet. Dhuna ndaj sportistëve, arbitrave apo trajnerëve mund të dënohet deri në 5 vjet burg.
Hyrja në stadium
Portat për tifozët do të hapen në orën 15:00, ndërsa policia apelon që sportdashësit të paraqiten herët për të shmangur vonesat prej fluksit të madh.
Policia e Shtetit njofton se qindra punonjës policie do të jenë të angazhuar për garantimin e sigurisë dhe mbarëvajtjes së aktivitetit, duke apeluar për qetësi dhe respektim rregullash.
