Një operacion i përbashkët SHBA–Meksikë ka vënë sot në shënjestër Grupin e Krimit të Organizuar Hysa, një rrjet ndërkombëtar me rrënjë shqiptare, i dyshuar prej vitesh për pastrim parash, bashkëpunim me kartelet e drogës dhe aktivitete kriminale që shtrihen nga Meksika në Europë e deri në Kanada.
Departamenti Amerikan i Thesarit ka sanksionuar 27 individë dhe kompani, ndërsa FinCEN ka propozuar një masë të fortë për t’ua prerë rrjetit të Hysajve aksesin në sistemin financiar amerikan.
Nënsekretari i Thesarit, John K. Hurley, tha se kjo goditje vjen si rezultat i “angazhimeve të reja SHBA–Meksikë për të luftuar narkotrafikun dhe pastrimin e parave”, duke paralajmëruar hapur: “Mesazhi ynë për ata që mbështesin kartelet është i qartë: Do të mbaheni përgjegjës.”
Sipas OFAC, familja Hysa — Luftar, Arben, Ramiz, Fatos dhe Fabjon — ka ngritur një strukturë komplekse kompanish që përdornin kazino, restorante dhe biznese të tjera në Meksikë si mbulesë për pastrimin e të ardhurave nga trafiku i drogës.
Në deklaratë thuhet se grupi operonte “me pëlqimin e Kartelit të Sinaloas”, ndërsa Luftar Hysa, i paraqitur shpesh në media si figurë publike dhe “biznesmen suksesi”, është cilësuar si një nga drejtuesit kryesorë të kësaj perandorie kriminale.
Autoritetet amerikane akuzojnë Arbenin për rol kyç në kontrabandimin e sasive të mëdha të parave cash drejt SHBA-së, Ramizin për përdorimin e kazinove dhe restoranteve si kanale pastrimi, ndërsa Fatosi e Fabjoni rezultojnë të lidhur me një entitet europian të përdorur për përfitime të paligjshme nga fondet e trafikantëve. Bashkëpunëtorë të afërt, si meksikani Gilberto Lopez Lopez dhe Eselda Baku (Hysa), përfshihen gjithashtu në listën e të sanksionuarve si persona që “kanë vepruar për ose në emër të kompanive të familjes Hysa”.
Thesari i SHBA-së thekson se “të gjitha pasuritë e personave të sanksionuar që ndodhen në SHBA bllokohen menjëherë”, ndërsa shkeljet e sanksioneve mund të çojnë në gjoba të rënda ose ndjekje penale. Institucionet financiare të huaja paralajmërohen gjithashtu se rrezikojnë sanksione dytësore nëse kryejnë transaksione të rëndësishme me rrjetin Hysa.
FinCEN, nga ana tjetër, ka identifikuar 10 kazino meksikane si qendra të pastrimit të parave të këtij grupi, duke paralajmëruar se “këto struktura janë përdorur për vite me radhë për të lehtësuar aktivitetet e Kartelit të Sinaloas”. Masat e propozuara do t’i detyrojnë bankat amerikane të bllokojnë çdo llogari që lidhet me këto kazino dhe të zgjerojnë ndjeshëm kontrollet e brendshme për të shmangur çdo transaksion të dyshimtë.
Ky operacion ndërkombëtar sjell edhe një reflektim të hidhur: shumë prej figurave që shfaqen publikisht si “sipërmarrës”, që japin intervista elegante për “suksesin”, që hapin restorante, kazino apo kompani me shkëlqim, mund të jenë — siç e tregon ky rast — pjesë e mekanizmave të errët që funksionojnë larg syrit të publikut. Rasti i Hysajve është një kujtesë e fortë se pas fasadës së “biznesmenëve të suksesshëm” mund të fshihet një tjetër realitet, dhe se institucionet ndërkombëtare vetëm sa e ekspozojnë atë që shpesh vendet e vogla preferojnë të mos e shohin.
Deklarata zyrtare e Departamentit Amerikan të Thesarit
