Diskriminimi institucional ndaj shqiptarëve në Luginën e Preshevës vazhdon të thellohet, duke prekur drejtpërdrejt arsimin, të drejtat qytetare dhe jetesën e përditshme. Kryetari i Këshillit Kombëtar Shqiptar, Enkel Rexhepi, paralajmëron se politikat e Beogradit po krijojnë kushte të qëllimshme për shpopullim të heshtur në Lugina e Preshevës, përmes pasivizimit të adresave, varfërisë, mosnjohjes së diplomave dhe përjashtimit nga institucionet shtetërore. Sipas tij, një nga treguesit më të qartë të këtij diskriminimi është gjendja e rëndë e shkollave ku mësojnë fëmijët shqiptarë.
“Shkollat të cilat janë shqiptarët, janë në gjendje të mjerueshme. Po ta shohim shkollat shqipe dhe shkollat serbe, domethënë, vetëm në Bujanoc dhe Preshevë, shkollat serbe janë të lulëzuara, janë të rregulluara ashtu në mënyrë sa më moderne evropiane. Ndërsa, ndërsa shkolla shqipe janë shkolla të mjerueshme. E kemi shkollën “Ibrahim Kelmendi” në Preshevë, e cila është ndër shkollat, domethënë e dyta më e madhja në Serbi, ajo është në gjendje të mjerueshme dhe nuk ngjason fare me shkollë. Ndërsa ende nxënësit e shkollës, po të kësaj shkolle apo shkollave të tjera, domethënë se e kanë një situatë të njëjtë, mësojnë në bodrumet e atyre institucioneve, sepse janë në gjendje të mjerueshme. Shteti nuk merr asnjë hap konkret për zgjidhjen apo për rregullimin e shkollave në mënyra më moderne”, tregon Rexhepi për KosovaPress.
Situata e përshkruar nxjerr në pah pabarazitë e vazhdueshme që prekin komunitetin shqiptar në Luginën e Preshevës, veçanërisht në fushën e arsimit dhe të drejtave bazë qytetare. Mungesa e investimeve, trajtimi i pabarabartë institucional dhe mosadresimi i problemeve strukturore vazhdojnë të rëndojnë mbi jetën e përditshme të banorëve. Pa ndërhyrje konkrete dhe pa zbatim real të standardeve evropiane për mbrojtjen e pakicave, këto problematika rrezikojnë të thellohen edhe më tej.
(Burimi: Pjesë e shkëputur nga intervista për KosovaPress)
