Të imagjinosh një përvojë pozitive nuk është thjesht një ushtrim mendor, por një proces që mund të ndryshojë realisht mënyrën se si funksionon truri ynë. Një studim i publikuar në revistën shkencore Nature Communications, nga Universiteti i Kolorados në Boulder në bashkëpunim me Institutin Max Planck për Shkencat Kognitive dhe të Trurit në Gjermani, tregon se truri mëson nga përvojat e imagjinuara pothuajse njësoj si nga ato reale.
Sipas koordinatorit të studimit, Roland Benoit, profesor i asociuar i psikologjisë dhe neuroshkencës në Universitetin e Kolorados, imagjinata nuk është një proces pasiv. “Ne mund të mësojmë nga përvojat e imagjinuara dhe në tru kjo ndodh në të njëjtën mënyrë si kur mësojmë nga përvojat reale,” shpjegon ai. Edhe autorja kryesore e studimit, Aroma Dabas, thekson se imagjinata “formëson në mënyrë aktive atë që presim dhe zgjedhim në të ardhmen”.
Studimi u zhvillua me 50 vullnetarë, të cilëve iu kërkua të rendisnin 30 persona sipas perceptimit të tyre: të këndshëm, neutralë ose të papëlqyeshëm. Më pas, pjesëmarrësit iu nënshtruan rezonancës magnetike funksionale (fMRI), ndërsa imagjinonin në mënyrë intensive përvoja pozitive ose negative me personat që i konsideronin neutralë.
Rezultatet treguan se, pas eksperimentit, pjesëmarrësit shfaqën një preferencë më të fortë për ata persona me të cilët kishin “përjetuar” përvoja pozitive në imagjinatën e tyre. Në testet pasuese, ata i vlerësuan këta individë si më të pëlqyeshëm, edhe pse përvoja kishte qenë vetëm e imagjinuar.
Nga ana neurologjike, ky efekt lidhet me aktivizimin e striatumit ventral, një zonë e trurit e përfshirë në përpunimin e shpërblimit dhe motivimit, e cila bashkëvepron me korteksin prefrontal dorsomedial, përgjegjës për ruajtjen dhe përpunimin e kujtimeve personale. Ky bashkëpunim bën që përvojat pozitive të imagjinuara të ndikojnë drejtpërdrejt në pritshmëritë dhe vendimmarrjen tonë.
Sipas studiuesve, këto gjetje hapin perspektiva të reja në trajtimin e problemeve të shëndetit mendor, në përmirësimin e marrëdhënieve ndërpersonale, si dhe në rritjen e performancës në fusha si sporti apo muzika. Studimi sugjeron se mendimi pozitiv dhe imagjinata e drejtuar mund të shndërrohen në mjete konkrete për zhvillim personal dhe mirëqenie mendore.
(Burimi: ANSA)
