Në një kohë kur medikamente si Ozempic kanë ndryshuar shpejt pamjen fizike të shumë personazheve në Hollywood, këngëtarja Lizzo ka ndjekur një rrugë krejt tjetër: të qetë, të qëndrueshme dhe pa “rrugë të shkurtra”.
Ajo ka treguar se ka provuar “çdo gjë” për të humbur peshë, por pa pranuar konkretisht përdorimin e injeksioneve. Megjithatë, çfarë e ka ndihmuar vërtet ka qenë një kombinim disipline, mendësie dhe zakonesh të qëndrueshme.
Sipas raportimeve, artistja ka humbur rreth 27 kilogramë (60 paund), por nuk e ka konfirmuar publikisht këtë shifër, për të shmangur krahasimet me të tjerët.
Së fundmi, ajo ka zbuluar se ka dy muaj pa konsumuar alkool, një hap që e ka ndërmarrë edhe më parë gjatë rrugëtimit të saj drejt një stili jetese më të shëndetshëm.
Ajo shpjegon filozofinë e saj thjesht: gjithçka lidhet me balancën mes kalorive që merr dhe atyre që djeg. “Ozempic funksionon sepse ha më pak. Nëse arrin ta bësh këtë vetë, është e njëjta gjë,” ka thënë ajo në një intervistë.
Udhëtimi i saj nisi seriozisht në fund të vitit 2023, në një periudhë kur, sipas saj, ishte në gjendje të rënduar emocionale. Më parë, ajo kishte tendencë të përballej me stresin duke ngrënë në mënyrë të tepruar, por gradualisht ndryshoi qasjen.
Ecja është bërë një nga mënyrat e saj kryesore për të menaxhuar ankthin dhe tensionin. Madje, në një moment ajo ka arritur deri në 17 mijë hapa në ditë.
Një tjetër ndryshim i madh ishte dieta. Pas 10 vitesh si vegjetariane, Lizzo vendosi të konsumojë mish, pasi kuptoi se dieta e saj e mëparshme e çonte në mbi 3,000 kalori në ditë. Me ushqime më natyrale dhe proteina të plota si mish, peshk dhe vezë, ajo ndihej më e ngopur dhe më e balancuar.
Por përtej dietës dhe ushtrimeve, ajo thekson se gjithçka nis nga mendësia. “Nuk kam dashur kurrë tё bëhem e dobët. Nuk ka asgjë të keqe të jesh në një trup më të madh. Por nëse një grua do të ndryshojë, duhet të ketë të drejtën ta bëjë,” shprehet ajo.
Ekspertët bien dakord se ky është çelësi: konsistenca, jo perfeksioni. Në vend të një qasjeje “gjithçka ose asgjë”, rezultatet vijnë nga rutina e përditshme.
Në aspektin fizik, ajo ndjek disa rregulla bazë: stërvitje tre herë në javë, kardio çdo ditë dhe seanca në sauna për rikuperim. Ushtrimet e saj përfshijnë kombinime të forcës dhe kardios, si kërcimi me litar, squats, ushtrime me pesha dhe Pilates.
Kërcimi me litar, për shembull, është një nga mënyrat më të thjeshta dhe më efektive që ajo përdor për të rritur rrahjet e zemrës dhe për të djegur kalori – një ushtrim që mund të bëhet edhe në shtëpi me një kosto minimale.
Një tjetër element i rëndësishëm është kontrolli i kalorive. Edhe pse Lizzo ka një kuzhinier personal që e ndihmon me ushqimin, ajo thekson rëndësinë e të qenit e vetëdijshme për atë që konsumon çdo ditë.
Ajo nisi rrugёtimin e saj jo për “rezultate të shpejta”, por për ndryshime reale dhe afatgjata. Një kombinim i mendjes, disiplinës dhe zakoneve të vogla – që, sipas saj, bëjnë diferencën më të madhe.
(Burimi: The Sun)
