Nga kontrasT.al
Prej dy ditësh, sistemi i fiskalizimit që bën të mundur lëshimin e faturave nga bizneset nuk funksionon. Bizneset as nuk japin, as nuk marrin dot mall, për shkakun se nuk presin dot faturë tatimore.
Që nga 29 prilli i vitit të kaluar, tenderi me vlerë 7.7 milionë euro me objekt “Mirëmbajtje e Modulit të Menaxhimit të Kontrollit të Faturimit për Drejtorinë e Përgjithshme të Tatimeve.” – dështon.
Mirëmbajtja e sistemit ka mbetur pa “zot” dhe bizneset kanë mbetur me sytë nga “qielli” i tatimeve. Kur do rregullohet serveri i fiskalizimit që të rifillojë lëshimi i faturave nga bizneset? Përse u prish dhe kush e nxori jashtë funksionit?
Më parë, sistemi i fiskalizimit mirëmbahej nga një kompani kroate, Primus, derisa grupi i strukturuar kriminal që “sekuestroi” AKSHI-n, vendosi t’i hiqte qafe kroatët dhe ta merrte sistemin e fiskalizimit vetë.
Tenderi për mirëmbajtjen e fiskalizimit ka mbetur “pending”, thuajse një vit nga shpallja e tij dhe aktualisht pa “mirëmbajtës”, për shkak të moszhvillimit të tij.
Kjo gjendje “knock downi” e sistemit që bën të mundur aktivitetin e përditshëm të biznesit, po ngarkon çdo ditë e më shumë me një barrë të rëndë ekonominë dhe qytetarët.
“Mirëmbajtësit” e arratisur nga drejtësia kanë akoma në duar çelësat e fiskalizimit. Sa herë ata i zë “gjumi” atje ku janë, i gjithë biznesi detyrohet të flerë bashkë me ta.
Kjo gjendje kolapsi, mund të prekë edhe portalin E-Albania për shërbimet publike që ofrohen në mënyrë elektronike. Në datën 2 shkurt 2026 është njoftuar se futet në punë versioni i ri “modern” E-Albania 2.0.
Pas shpërthimit të skandalit të AKSH-it, E-Albania nuk funksionon normalisht dhe paraqet probleme të mëdha. Në një njoftim të ditëve të fundit që shfaqet në E-Albania thuhet se “Drejtoria e Përgjithshme e Gjendjes Civile do të realizojë operacione mirëmbajtjeje dhe përmirësimi të sistemit elektronik të saj dhe se gjatë këtyre proceseve mund të ketë ndërprerje të përkohshme apo ngadalësime në marrjen e të dhënave përmes ndërveprimit me Regjistrin Kombëtar të Gjendjes Civile.”
Të gjitha institucionet e administratës publike, ashtu si Drejtoria e Gjendjes Civile, janë vendosur nën presionin e “Diellës” që po lind versionin 2.0 të E-Albania-s. Asnjë institucion nuk ka gati e të qepur një “kostum” elektronik, që t’i përshtatet Diellës me versionin e ri 2.0.
Kjo do sillte një kolaps të paimagjinueshëm të ndërveprimeve ndërmjet institucioneve shtetërore dhe publikut, ashtu si bizneset me “fiskalizimin” që këto dy ditë kanë vetëm dy rrugë: ose të kryejnë veprime pa faturë, ose të tejkalojnë afatet e mospërdorimit të saj. Në të dy rastet janë fajtorë!
Por fajtorët e vërtetë nuk janë qytetarët, as “Diella” që po vendoset në stendën e barcoletave. Fajtorët e vërtetë mund të gjenden ose në Dubai, ose në Kryeministri.
