Një hetim tronditës i gazetës britanike The Guardian ka zbuluar se rrjete të organizuara trafikimi kanë përdorur platformat Facebook dhe Instagram për të shfrytëzuar seksualisht të miturit, duke nxjerrë në pah mangësi serioze në kontrollin dhe sigurinë e këtyre platformave.
Sipas raportimit, predatorët kanë përdorur veçanërisht mesazhet private në Messenger dhe funksionet si “Stories” në Instagram për të identifikuar, manipuluar dhe më pas shitur fëmijë, ndërsa aktiviteti zhvillohej kryesisht në llogari të mbyllura, larg vëzhgimit publik.
Hetimi, i nisur që në vitin 2021, ka ndikuar drejtpërdrejt në një proces gjyqësor në SHBA, që përfundoi me një gjobë prej 375 milionë dollarësh ndaj kompanisë mëmë Meta, ndërsa vijon të përdoret si bazë për hetime të tjera penale dhe procese civile.
Gazetarët dokumentuan raste konkrete ku fëmijët manipuloheshin gradualisht përmes komunikimit online, si dhe mënyrën se si pagesat koordinoheshin përmes shërbimeve të brendshme si Meta Pay. Sipas raportit, mekanizmat automatikë të monitorimit kanë qenë të kufizuar, duke lejuar që një pjesë e madhe e aktivitetit të paligjshëm të kalojë pa u zbuluar.
Ish-moderatorë të përmbajtjes në këto platforma kanë deklaruar se raportimet për abuzime seksuale ndaj fëmijëve shpesh injoroheshin ose nuk trajtoheshin me prioritet, për shkak të volumit të madh të materialeve problematike dhe politikave të brendshme që pengonin reagimin e shpejtë.
Hetimi përfshiu edhe raportime në terren nga strehëza në SHBA, ku u evidentua se shumë të mitur joshen fillimisht në rrjetet sociale dhe më pas detyrohen të hyjnë në rrjete trafikimi. Ekspertët theksojnë se situata u përkeqësua gjatë pandemisë COVID-19, kur fëmijët kalonin më shumë kohë online dhe u bënë më të ekspozuar ndaj rrezikut.
Autoritetet dhe specialistët e sigurisë digjitale paralajmërojnë se rasti nxjerr në pah dobësi sistemike në mënyrën se si platformat sociale parandalojnë abuzimin, duke kërkuar masa më të forta mbrojtëse për përdoruesit më të vegjël.
(Burimi: AA)
