Një akt i rëndë vandalizmi ka tronditur komunitetin e Carnago, në provincën e Varese, ku një grup prej shtatë të rinjsh kanë dëmtuar skenën e lindjes së Krishtit të vendosur në sheshin kryesor të qytetit.
Gjatë natës mes së premtes, 19 dhjetor, dhe të shtunës, 20 dhjetor, ata kanë vendosur një shishe xhini në djep, kanë thyer dhe dëmtuar disa nga statujat dhe më pas janë fotografuar duke u tallur me aktin e tyre. Fotot, të publikuara në rrjetet sociale, i tregojnë të rinjtë në grup me shishet me alkool nё dorё, duke u mburrur hapur për atë që kishin bërë.
Administrata bashkiake reagoi menjëherë, duke i cilësuar autorët si “injorantë” dhe duke u bërë thirrje qytetarëve që, nëse i njohin, të kontaktojnë policinë lokale, e cila ka nisur hetimet për identifikimin e tyre.
Kryetarja e bashkisë, Barbara Carabelli, sqaroi se termi “injorantë” lidhet me mungesën e respektit për rregullat e jetesës së civilizuar, duke theksuar se ky vandalizëm cenon punën dhe përkushtimin e shumë vullnetarëve që kishin kontribuar për të krijuar diçka për të gjithë qytetin.
Ajo shtoi se, duke u mburrur në rrjete sociale, autorët në fakt kanë ndihmuar vetë autoritetet për t’i identifikuar, ndërsa u bëri thirrje qytetarëve dhe prindërve të bashkëpunojnë për të parandaluar raste të ngjashme në të ardhmen.
(Burimi: TGCOM)
