Një përplasje e paprecedentë tronditi këtë javë konkursin më të madh të bukurisë në botë, Miss Universe 2025, pasi dhjetëra konkurrente u ngritën dhe braktisën një event zyrtar në shenjë proteste kundër trajtimit poshtërues që iu bë përfaqësueses së Meksikës, Fátima Bosch, nga drejtori tajlandez i konkursit, Nawat Itsaragrisil.
Ngjarja ndodhi në Bangkok, gjatë një aktiviteti paraprak të transmetuar drejtpërdrejt, ku drejtuesi vendas iu drejtua Bosch me tone përçmuese, duke e qortuar publikisht për mos-postimin mjaftueshëm të përmbajtjeve promovuese tё Tajlandёs në rrjetet sociale. Skena u përshkallëzua shpejt, kur Bosch tentoi të shpjegohej dhe Nawat e ndërpreu duke i bërtitur të heshtë, ndërsa e quajti “kokёboshe”.
Pamjet nga transmetimi u shpërndanë me shpejtësi në internet, duke nxitur një reagim të menjëhershëm ndërkombëtar. Në solidaritet me përfaqësuesen meksikane, dhjetëra konkurrente të tjera, ende të veshura me fustane dhe shiritat e vendeve të tyre, u ngritën dhe dolën nga salla, ndërsa disa brohoritën “respekt!” dhe “mjaft më!”. Edhe Miss Universe 2024, Victoria Kjær Theilvig nga Danimarka, u bashkua në protestë, duke deklaruar: “Ky është një moment për të mbrojtur të drejtat e grave. Të fyesh publikisht një tjetër vajzë është përtej çdo kufiri. Kjo është arsyeja pse po marr kurorёn dhe po dal jashtë.”
Në një moment që tashmë po cilësohet si “bojkoti i parë historik” në Miss Universe, reagimi i Organizatёs sё Miss Universe nuk vonoi. Presidenti Raúl Rocha Cantú dënoi ashpër sjelljen e Nawat, duke e cilësuar si “të papranueshme, poshtëruese dhe abuzive”, dhe njoftoi se organizata ndërkombëtare ka marrë kontrollin e menjëhershëm të ngjarjes, duke dërguar përfaqësues të saj në Tajlandë për të mbikëqyrur çdo aktivitet. Ai shtoi se Organizata do të ndërmarrë masa ligjore ndaj drejtuesit lokal për “fyerje publike dhe intimidim të një konkurrenteje”.
Në deklaratën e saj për mediat, Fátima Bosch tha se ishte e tronditur, por e vendosur: “Jemi në shekullin e 21-të. Unë nuk jam kukull për t’u veshur e grimuar sipas dëshirës së dikujt tjetër. Jam këtu për të qenë zë për gratë dhe vajzat që luftojnë çdo ditë për respekt dhe barazi.”
Mediat ndërkombëtare si BBC, CNN, NDTV dhe Cosmopolitan raportuan se Nawat, 60 vjeç, është përpjekur më pas të zbusë situatën me një video-falje, ku shprehet: “Nëse dikush është ndier keq apo i lënduar, kërkoj falje sinqerisht, sidomos vajzave që ishin të pranishme.”
Por falja e tij nuk i ka bindur të gjithë. Në rrjetet sociale, hashtag-u#RespectMissMexico u përhap me miliona klikime, ndërsa mijëra përdorues e akuzuan organizatorin për sjellje seksiste dhe abuzim me pushtetin. Shumë ish-konkurrente të viteve të kaluara, përfshirë ish-fitueset nga Kolumbia, Filipinet dhe Franca, shprehën mbështetjen për Bosch, duke theksuar se “dinjiteti nuk është opsional në një skenë që pretendon të fuqizojë femrat”.
Incidenti ka ndezur një debat të gjerë mbi mënyrën se si funksionojnë ende shumë konkurse bukurie — midis shfaqjes, sponsorizimeve komerciale dhe kauzave që ato promovojnë. Analistët e industrisë e quajnë këtë ngjarje një “pikë kthese”, duke paralajmëruar se Miss Universe duhet të përballet seriozisht me pyetjen: a po e ndihmon vërtet gruan moderne apo ende po e përdor si simbol estetik?
Pavarësisht trazirave, Organizata e Miss Universe ka konfirmuar se aktivitetet e planifikuara do të vazhdojnë dhe se finalja e madhe e Miss Universe 2025 do të mbahet më 21 nëntor në Bangkok, me përfaqësuese nga mbi 90 shtete.
Megjithatë, një gjë është e qartë: ajo që ndodhi në atë sallë në Tajlandë nuk ishte thjesht një incident — ishte një shpërthim i zërit të grave që refuzojnë të nënshtrohen ndaj poshtërimit. Dhe për herë të parë, Miss Universe nuk po flet vetëm për bukurinë, por për dinjitetin.
