Një kapsulë e kompanisë SpaceX me katër astronautë u nis drejt Stacionit Ndërkombëtar të Hapësirës (ISS), në një mision që synon rikthimin e funksionimit normal të laboratorit orbital pas një muaji me staf minimal.
Misioni i quajtur Crew-12 u lëshua rreth orës 05:17 të mëngjesit nga baza hapësinore Cape Canaveral në Florida dhe pritet të ankorohet në stacion pasditen e së shtunës. NASA, e cila bashkëpunon me SpaceX për transportin e astronautëve, kishte përshpejtuar nisjen për shkak të mungesës së personelit në ISS, megjithëse dy tentativa u shtynë më herët për shkak të motit të pafavorshëm.
Menaxheri i Programit Komercial të Fluturimeve të NASA-s, Steve Stich, theksoi se përgatitja e ekuipazhit ishte vendimtare për datën e nisjes. “Kur shikon një mision në tërësi, bëhet fjalë për përgatitjen e mjeteve, harduerit, softuerit — por edhe të ekuipazhit,” tha ai.
Prej mesit të janarit, stacioni hapësinor kishte vetëm tre astronautë në bord, shumë më pak se shtatë personat që konsiderohen minimumi për funksionim optimal. Situata u krijua pasi misioni i mëparshëm, Crew-11, u detyrua të kthehej herët në Tokë për shkak të një problemi mjekësor të mbajtur sekret.
Kreu i NASA-s, Jared Isaacman, e cilësoi reagimin e agjencisë si shembull të fokusit ndaj misionit. “Në pak javë sollëm Crew-11 në Tokë, përshpejtuam Crew-12 dhe paralelisht po përgatitemi për misionin Artemis II,” deklaroi ai, duke iu referuar fluturimit të ardhshëm drejt Hënës.
Në bordin e Crew-12 ndodhen astronautët e NASA-s Jessica Meir dhe Jack Hathaway, astronautja e Agjencisë Evropiane të Hapësirës Sophie Adenot dhe kozmonauti rus Andrey Fedyaev.
Normalisht, NASA organizon një periudhë mbivendosjeje mes ekuipazheve për të lehtësuar dorëzimin e detyrave, por largimi emergjent i Crew-11 e bëri të pamundur këtë proces. Megjithatë, sipas Meir, ekuipazhet arritën të shkëmbenin informacion në Tokë përpara nisjes.
Edhe pse stacioni mund të operojë me tre persona — siç ka ndodhur shpesh vite më parë — mungesa e stafit kufizon ndjeshëm kërkimin shkencor. ISS kushton rreth 3 miliardë dollarë në vit për t’u mirëmbajtur, ndaj NASA e konsideron praninë e një ekuipazhi të plotë thelbësore për të maksimizuar rezultatet.
Gjatë qëndrimit rreth tetëmujor në hapësirë, astronautët do të kryejnë një sërë eksperimentesh, përfshirë studime mbi qarkullimin e gjakut, kërkime farmaceutike për bakteret që shkaktojnë pneumoni dhe një simulim të uljes në Hënë për të analizuar ndikimin e ndryshimeve të gravitetit në trupin dhe mendjen e njeriut.
NASA shpreson që kërkimi në ISS të ndihmojë në hapjen e rrugës për stacione hapësinore komerciale, të cilat një ditë mund të zëvendësojnë laboratorin aktual dhe t’i lejojnë agjencisë të fokusohet më shumë në eksplorimin e hapësirës së thellë.
(Burimi: CNN)
