Prokuroria e Posaçme kundër Korrupsionit dhe Krimit të Organizuar (SPAK) sapo ka bërë publik njoftimin zyrtar mbi akuzën ndaj Belinda Ballukut, ministre e Infrastrukturës dhe Energjisë, e cila tashmë mban pozitën procedurale të të pandehurës në hetimin penal për “Shkelje të barazisë së pjesëmarrësve në tendera apo ankande publike”.
Në deklaratën zyrtare të SPAK thuhet:
“Prokuroria e Posaçme kundër Korrupsionit dhe Krimit të Organizuar po heton në kuadër të procedimit penal nr.136 të vitit 2025 (bashkuar me procedimet penale nr.167 dhe 181 të vitit 2024), për veprën penale ‘Shkelje e barazisë së pjesëmarrësve në tendera apo ankande publike’, parashikuar nga neni 258 i Kodit Penal. Në kuadër të hetimit të këtij procedimi penal, sot, më 31.10.2025 i është njoftuar akuza të pandehurës Belinda Balluku, me funksionin e lartë shtetëror, Ministër i Ministrisë së Infrastrukturës dhe Energjisë, akuzuar për kryerjen e veprës penale ‘Shkelje e barazisë së pjesëmarrësve në tendera apo ankande publike’, në bashkëpunim, parashikuar nga nenet 258/2 dhe 25 i Kodit Penal.”
Sipas njoftimit, hetimi lidhet me procedurën e prokurimit publik për ndërtimin e tunelit të Llogarasë, pjesë e seksionit Orikum–Himarë të autostradës SH8 (Vlorë–Sarandë). Procedura është zhvilluar fillimisht në datën 11 dhjetor 2020, është anuluar, dhe më pas është rihapur në 22 qershor 2021 me fond limit prej 18.9 miliardë lekësh pa TVSH.
SPAK saktëson gjithashtu se njoftimi i akuzës është bërë me shkresë zyrtare në datën 21 tetor 2025, me numër protokolli 37398, ndërsa e pandehura ka njoftuar se nuk mund të paraqitej në datën e caktuar. Pas kësaj, me një shkresë të dytë të datës 24 tetor 2025, SPAK kërkoi paraqitjen e saj sot, më 31 tetor, në orën 15:00.
Në njoftimin e SPAK, termi “e pandehur” përmendet katër herë, çka tregon se organi i akuzës ka kaluar nga faza e thjeshtë e verifikimeve në fazën e akuzës formale penale.
Ky status nënkupton se prokuroria ka arritur dyshime të bazuara në prova për përfshirjen e saj në kryerjen e veprës penale dhe tashmë Belinda Balluku nuk është më thjesht subjekt i hetimit, por palë e procedimit penal.
Në këtë fazë, ajo përfiton të gjitha të drejtat e mbrojtjes si çdo person i pandehur, përfshirë të drejtën për të marrë dijeni mbi provat, për të paraqitur argumente mbrojtëse dhe për t’u përfaqësuar nga avokati.
Nga ana tjetër, shpallja “e pandehur” krijon pasoja të drejtpërdrejta politike dhe institucionale, pasi tregon se SPAK ka kaluar në fazën e formalizimit të akuzës, duke vendosur ministren në një pozicion zyrtar nën hetim penal për një vepër të rëndë që lidhet me abuzimin në tendera publikë.
Sipas Kodit Penal, “shkelja e barazisë së pjesëmarrësve në tendera apo ankande publike” dënohet me burgim deri në 7 vjet, ndërsa në rastet kur kryhet në bashkëpunim, siç thuhet në akuzën ndaj Ballukut, dënimi mund të rritet.
Hetimet për tenderin e tunelit të Llogarasë janë ndër më të mëdhatë që SPAK ka zhvilluar në fushën e infrastrukturës publike, me fokus tek mënyra se si janë shpallur, anuluar dhe rihapur procedurat me vlera miliardëshe.
Në ditët në vijim pritet që organi i akuzës të sqarojë nëse do të kërkojë masa sigurie ndaj ministres, apo nëse hetimi do të vijojë në gjendje të lirë deri në dërgimin e dosjes në gjykatë.
