Në një njoftim të sotëm zyrtar SPAK bën me dije opinionin publik se ka përfunduar hetimet e nisura vetëm pesë muaj më parë, më 2.7.2025, ndaj një grupi të strukturuar kriminal që “guxoi” të futet në kompjuterat e zyrave të punës së SPAK për të hakuar dosje hetimore.
Njoftimi i SPAK tregon se ka dërguar për gjykim para Gjykatës së Posaçme të Shkallës së Parë tre të pandehur, një prej të cilëve Agim Ismaili, ish-drejtor i Përgjithshëm i Burgjeve, ish-drejtor i Përgjithshëm i Agjencisë Kombëtare të Ushqimit dhe ish-drejtor i Përgjithshëm i Inspektoratit Kombëtar të Mbrojtjes së Territorit, tre drejtori kyçe në administratën e lartë shtetërore të besuara tek ky person nga kryeministri Edi Rama.
SPAK, në njoftimin e sotëm, përmbledh fabulën e akuzës që bën ndaj Arnold Rrokajt, Zambak Gjonit dhe Agim Ismailit.
“I pandehuri Arnold Rrokaj aksesoi në mënyrë të paautorizuar materiale hetimore të Prokurorisë së Posaçme kundër Korrupsionit dhe Krimit të Organizuar, një pjesë e të cilave u dërguan në mënyrë të paligjshme tek të pandehurit Zambak Gjoni dhe Agim Ismaili, të cilët i shpërndajnë ato më pas tek persona të tretë.
Shtetasit Zambak Gjoni dhe Arnold Rrokaj u identifikuan në një kohë të shpejtë (brenda 24 orësh) dhe u arrestuan menjëherë duke parandaluar kështu edhe shpërndarjen e mëtejshme të materialeve hetimore.
Si rezultat i veprimeve të shumta hetimore dhe analizimit të tyre, akuzat u zgjeruan dhe për veprën penale të përgjimit të paligjshëm të të dhënave kompjuterike në ngarkim të shtetasit Agim Ismaili, i cili pasi u njoh me përmbajtjen e këtyre të dhënave, i shpërndau ato më tej, por edhe kërkoi në mënyrë të vetëdijshme thellimin e përgjimit të paligjshëm të sistemeve të Prokurorisë së Posaçme, duke kërkuar gjetjen e të dhënave për persona të ndryshëm.”
Megjithëse në fund të njoftimit SPAK bën sqarimin profesional se “Çdo person prezumohet i pafajshëm derisa nuk vërtetohet fajësia e tij me vendim gjyqësor të formës së prerë”, veprat penale në ngarkim të Agim Ismailit dhe dy bashkëpunëtorëve të tij kanë një peshë të rëndë me vite burgimi.
Agim Ismaili, i hetuar në gjendje të lirë, do dalë para GJKKO me akuza të rënda penale për vepra të neneve 293/a paragrafi 2, 28/4, 333/a dhe 334 të Kodit Penal, që në minimum dënimi parashikojnë 12 vite dhe maksimum 20 vite burgim. Vetëm nëse Agim Ismaili del i pafajshëm me vendim të gjykatës mund t’i shpëtojë burgimit me një afat të gjatë.
Arnold Rrokaj, i hetuar në gjendje “arresti në burg”, akuzohet për disa vepra penale që rrezikojnë burgimin e tij në minimum 15 vite dhe maksimum 20 vite burgim. Akuza ndaj tij është për veprat penale të parashikuara nga nenet 192/b paragrafi 2, 293/a paragrafi 2, 28/4, 333/a dhe 334 të Kodit Penal.
Zambak Gjoni, i hetuar në gjendje “arrest në burg”, akuzohet për vepra penale që rrezikojnë burgimin e tij në minimum 12 vite dhe maksimum 20 vite burgim. Akuza ndaj tij është për veprat penale të parashikuara nga nenet 293/a paragrafi 2, 28/4, 333/a dhe 334 të Kodit Penal.
Akuzat ndaj Agim Ismailit janë më të rëndat në vite burgim që i janë bërë deri sot nga SPAK ndonjë individi të veshur me autoritet shtetëror. Nëse kujtohet veprimtaria e tij dhe afërsia me kryeministrin Edi Rama, i cili i ka besuar Ismailit tre institucione të rëndësishme për t’i drejtuar, akuzat ndaj tij marrin një peshë të veçantë. Ato duken si një goditje e drejtpërdrejtë e një prej njerëzve të besuar të Edi Ramës. Kujtojmë se Dritan Palnikaj, nipi i Agim Ismailit, është një prej këshilltarëve të kryeministrit që sot mban rolin e Sekretarit të Përgjithshëm të Ministrisë së Bujqësisë.
SPAK me këto akuza dhe vitet e burgimit që kërkon ndaj Agim Ismailit, përveç rrezikshmërisë së veprave penale që parashikon Kodi Penal dhe hetimit “rrufe” që vërtetoi kryerjen e tyre nga një grup kriminal, futet në erën post Altin Dumani me një mesazh të veçantë publik: “Mos guxoni të fusni hundët brenda nesh!”, që në gjuhën e popullit mund të përkthehet edhe “Mos e krruani me ne!”
