Nëse kohët e fundit keni dëgjuar për “spermë salmoni” në kujdesin e lëkurës, me shumë gjasë ka qenë në kontekstin e trajtimeve anti-moshё që po çmendin Hollywood-in dhe nё industrinё koreane tё bukurisё, tё cilёs tё gjithё i referohen si K-beauty. Me premtime për lëkurë më të shndritshme, më të fortë dhe më rinore, ky përbërës i pazakontë është kthyer në një nga trendet më të përfolura të bukurisë.
Por çfarë është në të vërtetë sperma e salmonit në kozmetikë — dhe pse dermatologët po e marrin seriozisht?
Emri tingëllon i çuditshëm, por realiteti është shumë më “shkencor” sesa imagjinoni. Produktet e kujdesit të lëkurës nuk përmbajnë spermë salmoni, por një përbërës të quajtur PDRN (polydeoxyribonucleotide) — fragmente të pastruara të ADN-së, të nxjerra nga salmoni.
Sipas dermatologëve, kjo ADN është jashtëzakonisht e pasur me proteina dhe acide nukleike dhe ka një strukturë shumë të ngjashme me ADN-në njerëzore. Kjo e bën atë shumë të mirëpritur nga lëkura, pa irritime dhe me efekte rigjeneruese.
Pse po bëhet kaq popullor?
Në Korenë e Jugut dhe në disa vende të Europës, PDRN përdoret prej vitesh në dermatologji, sidomos për rigjenerimin e lëkurës pas trajtimeve agresive, për shenjat e akneve dhe për anti-plakje.
Sipas specialistëve:
- ndihmon në rigjenerimin e qelizave të lëkurës
- stimulon prodhimin e kolagjenit
- përmirëson elasticitetin dhe hidratimin
- qetëson inflamacionin
- forcon barrierën natyrale të lëkurës
Prandaj është kthyer në përbërës të preferuar për ata që kanë lëkurë të lodhur, të dëmtuar nga dielli apo shenjat e para të moshës.
Nga klinikat luksoze te rutina e përditshme
Trajtimet profesionale me PDRN, shpesh të kombinuara me “microneedling” ose lazer, janë bërë shumë të njohura mes personazheve të famshëm si Kim Kardashian apo Jennifer Aniston. Por lajmi i mirë është se sot ky përbërës gjendet edhe në produkte qё përdorim në shtëpi: serumë, kremra, maska pёr fytyrёn dhe pёr sytë.
Këto produkte synojnë të ofrojnë të njëjtat përfitime në mënyrë graduale, pa kosto marramendëse dhe pa procedura invazive.
A ia vlen ta provosh?
Dermatologët theksojnë se PDRN është veçanërisht i dobishëm për:
- lëkurë të dehidratuar
- shenja të hershme plakjeje
- dëmtime nga dielli
- barrierë të dobësuar të lëkurës
Falë përputhshmërisë së lartë me organizmin, konsiderohet një përbërës i sigurt dhe efektiv për përdorim afatgjatë.
Pra, edhe pse emri mund të tingëllojë i pazakontë, sperma e salmonit në kozmetikë nuk është thjesht një trend viral, por një përbërës që po fiton terren serioz në botën e kujdesit të lëkurës.
(Burimi: CNN)
