Kryeministri britanik Keir Starmer ka deklaruar se Princi Andrew duhet të jetë i gatshëm të dëshmojë para Kongresit Amerikan për çdo informacion që ka mbi lidhjet me Jeffrey Epstein, i akuzuar për abuzime seksuale ndaj të miturve.
Starmer, i cili ndodhet në Japoni për një takim me kryeministren Sanae Takaichi, u pyet nga gazetarët nëse ish-princi duhet t’u kërkojë falje viktimave dhe të japë dëshmi për atë që dinte mbi krimet e Epstein. Ai theksoi se prioritet duhet të jenë gjithmonë viktimat, ndërsa çështja e një kërkim-faljeje i takon vetë Andrew. “Por kushdo që ka informacion duhet të jetë i përgatitur ta ndajë atë në çdo formë që kërkohet. Nuk mund të pretendosh se je në krah të viktimave nëse nuk je i gatshëm ta bësh këtë,” u shpreh Starmer.
Andrew Mountbatten-Windsor, të cilit iu hoqën titujt mbretërorë vitin e kaluar për shkak të pasojave të miqësisë me Epstein, shfaqet dukshëm në pjesën më të fundit të dosjeve të publikuara nga Departamenti Amerikan i Drejtësisë. Në një prej materialeve ai duket i fotografuar i përkulur mbi një grua të shtrirë në dysheme.
Dokumentet përfshijnë edhe email-e që tregojnë se Andrew e ftoi Epstein në Buckingham Palace në shtator 2010, dy vjet pasi financieri ishte dënuar për përfshirje në një rast seksual me një vajzë 14-vjeçare. Vetëm një muaj para kësaj ftese, Epstein kishte sugjeruar organizimin e një darke për princin me një grua ruse 26-vjeçare, të cilën e përshkruante si “të zgjuar, të bukur dhe të besueshme”. Sipas dokumenteve, Andrew u përgjigj se do të ishte “i kënaqur” ta takonte dhe e pyeti Epstein nëse ishte “mirë të ishte i lirë” nga arresti shtëpiak.
Më vonë atë vit, të dy u fotografuan duke ecur së bashku në Central Park të Nju Jorkut. Në intervistën e tij të shumëkritikuar në Newsnight në vitin 2019, Andrew kishte pretenduar se udhëtimi në SHBA kishte për qëllim t’i jepte fund personalisht miqësisë me Epstein pas dënimit të tij. Megjithatë, emailet e publikuara së fundmi sugjerojnë se publicistja e Hollivudit Peggy Siegal kishte organizuar një darkë me personazhe të njohur në shtëpinë e Epstein në Nju Jork gjatë asaj vizite. Mes të ftuarve thuhet se ishin regjisori Woody Allen dhe prezantuesi George Stephanopoulos, ish-ndihmës i lartë i Bill Clinton.
Dokumentet tregojnë gjithashtu se Andrew kishte vazhduar t’i dërgonte Epstein foto familjare intime me vajzat e tij të rritura, Princess Beatrice dhe Princess Eugenie. Në vitin 2022, ai pagoi rreth 12 milionë paund për të zgjidhur një padi civile të ngritur nga Virginia Giuffre, e cila pretendonte se ishte detyruar të kryente marrëdhënie seksuale me princin pasi ishte trafikuar nga Epstein dhe bashkëpunëtorja e tij Ghislaine Maxwell. Pagesa u bë pa pranim përgjegjësie dhe Andrew ka mohuar vazhdimisht çdo shkelje.
Pavarësisht kësaj, ai dhe ish-bashkëshortja e tij Sarah Ferguson janë përjashtuar nga rrethet mbretërore për shkak të vendimit për të ruajtur marrëdhënie me Epstein edhe pas dënimit të tij të parë. Financieri madje i kishte dhënë Fergusonit 15 mijë paund për të shlyer borxhet, ndërsa ajo e përshkruante në një email si “vëllai që kishte dashur gjithmonë”.
Dosjet përmbajnë edhe korrespondencë mes Andrew dhe Maxwell, e cila aktualisht po vuan një dënim 20-vjeçar në SHBA për trafikim seksual të të miturve. Në një email të vitit 2005, princi i shkruante Maxwell për një udhëtim të mundshëm në SHBA: “Jam në duart tuaja (fjalë për fjalë) deri të shtunën/të dielën”, duke e mbyllur mesazhin me “Të dua A xxx.”
Materialet e reja zbulojnë edhe episode të sikletshme për figura të tjera britanike. Sipas tyre, Epstein i dërgoi 10 mijë paund Reinaldo Avila da Silva, bashkëshortit të aleatit laburist Peter Mandelson, një vit pas dënimit të tij, para që dyshohet se u përdorën për financimin e një kursi osteopatie.
Epstein u vetëvra në një burg të Nju Jorkut në vitin 2019, ndërsa priste gjyqin për akuza të reja për abuzim seksual me fëmijë.
(Burimi: The Guardian)
