Dokumente të publikuara së fundmi nga Departamenti i Drejtësisë i SHBA-së hedhin dritë mbi komunikimet mes ish-këshilltarit të Shtëpisë së Bardhë, Steve Bannon, dhe financierit të dënuar për krime seksuale, Jeffrey Epstein, duke zbuluar diskutime për strategji kundër Papa Françeskut.
Mesazhet, që datojnë nga viti 2019, tregojnë se Bannon shpresonte të minonte ndikimin e Papës, të cilin e shihte si kundërshtar të vizionit të tij “sovranist” – një formë populizmi nacionalist që fitoi terren në Evropë gjatë asaj periudhe. Në një prej komunikimeve, Bannon i shkruante Epsteinit: “Do ta rrëzoj (Papa) Françeskun. Klintonët, Xi, Françesku, BE – hajde vëlla.”
Sipas dokumenteve, Bannon kishte qenë prej kohësh kritik ndaj Papës, duke e akuzuar se mbante anën e “elitave globaliste”. Ai madje thuhet se i kishte kërkuar politikanit italian Matteo Salvini ta “sulmonte” Papën, ndërsa vetë kishte ngritur një bazë aktiviteti në Romë dhe ishte përfshirë në përpjekje për krijimin e një akademie politike që synonte mbrojtjen e vlerave judeo-kristiane.
Një element tjetër i dosjeve lidhet me librin “Në dollapin e Vatikanit” të gazetarit francez Frédéric Martel, i cili trajtonte sekretet dhe hipokrizinë e pretenduar në nivelet e larta të Kishës. Bannon shfaqi interes për ta kthyer librin në film dhe duket se sugjeroi që Epstein të merrte rolin e producentit ekzekutiv. Nuk është e qartë sa serioz ishte ky propozim, ndërsa Epstein nuk iu përgjigj drejtpërdrejt ofertës.
Vetë Martel ka deklaruar se beson se Bannon kërkonte ta “instrumentalizonte” librin për ta përdorur kundër Papa Françeskut. Një biograf i Papës, Austen Ivereigh, tha se Bannon mund të ketë menduar se materiali do të dëmtonte imazhin e tij, por “e gjykoi gabim natyrën e librit – dhe të Papës”.
Mesazhet tregojnë gjithashtu se Epstein i kishte dërguar Bannonit artikuj kritikë ndaj Vatikanit, ndërsa në një rast, kur u pyet “Papa Françesku apo Steve Bannon? Katolikët duhet të zgjedhin”, Bannon u përgjigj: “Zgjedhje e lehtë.”
Zbulimet janë edhe më të ndjeshme duke pasur parasysh se komunikimet ndodhën vite pas dënimit të Epstein në vitin 2008 për vepra seksuale ndaj të miturve dhe pak para arrestimit të tij për trafikim seksual.
Reverendi Antonio Spadaro, bashkëpunëtor i afërt i Papa Françeskut, tha se mesazhet tregojnë një përpjekje për të bashkuar “autoritetin shpirtëror me pushtetin politik për qëllime strategjike”. Sipas tij, Papa i rezistoi këtij tundimi dhe kundërshtoi përdorimin e besimit si armë politike.
Papa Françesku ishte shpesh një kundërpeshë ndaj nacionalizmit dhe një zë i fortë në mbrojtje të emigrantëve, çka e vendosi në konflikt me disa rryma konservatore. Kundërshtitë ndaj tij arritën kulmin në vitin 2018, kur ish-ambasadori papnor në SHBA, Carlo Maria Viganò, e akuzoi për dështim në trajtimin e një rasti abuzimi seksual – akuza nga të cilat Papa u lirua më vonë pas një hetimi të Vatikanit.
Dosjet përfshijnë edhe shkëmbime të tjera të pazakonta, përfshirë një email ku Epstein përmend librin e Martel dhe një mesazh ku citon vargjet e “Parajsës së Humbur” të John Milton: “Më mirë të mbretërosh në Ferr sesa të shërbesh në Parajsë.”
Zbulimet e reja pritet të nxisin debat të fortë mbi ndërthurjen e politikës, ideologjisë dhe fesë, si dhe mbi rrjetin e kontakteve që Epstein ruante edhe pas dënimeve të tij.
(Burimi: CNN)
