Striptistja e kthyer në avokate, Christine DeMaria, ka ngritur padi kundër pesë klubeve të natës në Nju Jork, duke i akuzuar për trafikim, përdhunim dhe dhunë ndaj grave që punonin si kёrcimtare.
Sipas saj, klubet kanë përfituar financiarisht duke mbyllur sytë përballë abuzimeve të rënda që ndodhnin në ambientet e tyre, ku klientët paguanin për “shërbime private” dhe shpesh ushtronin dhunë seksuale ndaj punonjëseve.
DeMaria, e cila sot është 37 vjeçe, ka treguar se gjatë viteve të punës si striptiste është dhunuar fizikisht dhe seksualisht nga klientë, ndërsa drejtuesit e lokaleve nuk kanë ndërmarrë asnjë veprim për ta mbrojtur. Ajo është pushuar nga puna në momentin që ka denoncuar një nga rastet e përdhunimit, ndërsa menaxherët i kanë thënë se “si striptiste e ka kërkuar vetë”.
Në padinë e saj në Gjykatën e Lartë të Manhatanit, DeMaria kërkon 10 milionë dollarë dëmshpërblim nga klubet Sapphire 39 dhe Sapphire 60 për përdhunim, dhunë seksuale, trafikim njerëzor dhe burgosje të paligjshme. Një padi tjetër prej 15 milionë dollarësh është ngritur ndaj Vivid Cabaret dhe Hoops Cabaret, të cilat kanë të njëjtët pronarë, ndërsa ndaj klubit Gossip në Long Island ajo kërkon 2.5 milionë dollarë për ngacmim seksual dhe diskriminim gjinor.
Katër ish-striptiste të tjera janë bashkuar në procesin gjyqësor kundër Sapphire, duke pretenduar se edhe ato kanë qenë viktima të dhunës seksuale dhe të abuzimeve nga klientët dhe stafi drejtues.
Avokatja Megan Goddard, që përfaqëson DeMarian dhe pesë gra të tjera, ka deklaruar se shumë klube të tilla në Nju Jork funksionojnë me bindjen se gratë që punojnë si striptiste kanë pranuar automatikisht çdo formë abuzimi, gjë që përbën shkelje të rëndë ligjore dhe njerëzore.
Christine DeMaria është rritur në Nju Xhersi dhe në moshën 15-vjeçare është trafikuar drejt Arizonës nga një burrë që e kishte mashtruar dhe shfrytëzuar. Ajo ka punuar për vite me radhë në industrinë e striptizmit dhe është larguar përfundimisht në vitin 2021. Pas largimit, vendosi të ndryshojë jetën dhe u regjistrua në New York Law School, ku u diplomua në vitin 2024 dhe kaloi provimin e shtetit për avokate.
Gjatë studimeve themeloi organizatën jofitimprurëse “Switch – Sex Workers in Transition Compassion Home”, që ndihmon punonjëset e industrisë së seksit me arsimim, këshillim dhe mbështetje për t’u integruar në profesione të tjera. Për punën e saj humanitare, ajo u vlerësua në vitin 2023 me çmimin “David Prize” nga Fondacioni Walentas Family, që i jep çdo vit 200 mijë dollarë pesë “vizionarëve të qytetit”.
Në një reagim për mediat, përfaqësuesit e klubit Sapphire kanë thënë se i marrin seriozisht pretendimet e këtij lloji, por kanë theksuar se nuk kanë marrë ndonjë detaj konkret për ngjarjet e përmendura, të cilat thuhet se kanë ndodhur një dekadë më parë.
Christine DeMaria thotë se tani, si juriste, është e vendosur të mbrojë gratë që janë viktima të abuzimeve në industrinë e striptizmit dhe të kërkojë drejtësi për ato që për vite me radhë janë lënë pa zë.
(Burimi: New York Post)
