Përdorimi i antibiotikëve mund të ketë pasoja shumë më të gjata sesa mendohej më parë për organizmin e njeriut. Sipas një studimi të kryer nga Universiteti i Uppsala-s në Suedi dhe të publikuar në revistën shkencore Nature Medicine, një kurë me antibiotikë mund të ndryshojë përbërjen e baktereve të dobishme në zorrë për deri në tetë vjet.
Antibiotikët konsiderohen ilaçe jetësore në trajtimin e infeksioneve bakteriale, por përveç efekteve anësore të zakonshme që mund të shoqërojnë çdo medikament, ato mund të kenë edhe pasoja të tjera që lidhen drejtpërdrejt me mënyrën se si funksionojnë. Nga njëra anë, përdorimi i tyre mund të favorizojë zhvillimin e baktereve rezistente ndaj trajtimit, ndërsa nga ana tjetër mund të dëmtojë edhe bakteret e dobishme që jetojnë në trup dhe që janë të rëndësishme për shëndetin e përgjithshëm.
Pikërisht në këtë aspekt u përqendrua studimi suedez. Studiuesit analizuan të dhënat nga regjistri kombëtar i barnave në Suedi dhe i krahasuan ato me një hartëzim të detajuar të mikrobiomës së zorrëve tek 14,979 të rritur.
Sipas autorit kryesor të studimit, Gabriel Baldanzi, rezultatet treguan një lidhje të qartë mes përdorimit të antibiotikëve dhe përbërjes së mikrobiomës së zorrëve shumë vite më vonë. “Ne arritëm të shohim se përdorimi i antibiotikëve edhe katër deri në tetë vjet më parë ishte i lidhur me përbërjen aktuale të mikrobiomës së zorrëve”, tha ai në një deklaratë. Sipas Baldanzi-t, në disa raste edhe një trajtim i vetëm me antibiotikë mund të lërë gjurmë afatgjata.
Studiuesit zbuluan gjithashtu se jo të gjithë antibiotikët kanë të njëjtin ndikim. Antibiotikët si klindamicina, fluorokinolonët dhe flukloksacilina u shoqëruan me ndryshimet më të mëdha në mikrobiomën e zorrëve. Ndërkohë, penicilina V, që është ndër antibiotikët më të përdorur jashtë spitaleve në Suedi, rezultoi të ketë ndikim shumë më të vogël dhe kryesisht afatshkurtër.
Përveç theksimit të rëndësisë së përdorimit të kujdesshëm të antibiotikëve, studiuesit thonë se studimi ofron edhe informacion të vlefshëm për praktikën klinike. Koordinatorja e studimit, Tove Fall, shpjegon se këto të dhëna mund të ndihmojnë mjekët në të ardhmen për të marrë vendime më të informuara.
Sipas saj, rezultatet mund të shërbejnë për të orientuar rekomandimet mbi përdorimin e antibiotikëve, veçanërisht në rastet kur duhet zgjedhur mes dy trajtimeve po aq efektive, por ku njëri prej tyre ka ndikim më të vogël në mikrobiomën e zorrëve.
Studimi sjell një tjetër dëshmi se përdorimi i antibiotikëve duhet të bëhet gjithmonë me rekomandim mjekësor dhe vetëm kur është vërtet i nevojshëm.
(Burimi: ANSA)
