Tatuazhet mund të kenë një ndikim afatgjatë në sistemin imunitar, më shumë sesa mendohej deri më tani. Sipas një studimi ndërkombëtar të publikuar në revistën shkencore PNAS, pigmentet e bojërave më të përdorura për tatuazhe – veçanërisht e zeza, e kuqja dhe jeshilja – nuk qëndrojnë vetëm në lëkurë, por lëvizin brenda trupit dhe grumbullohen në nyjet limfatike, organe kyçe për mbrojtjen imunitare.
Studimi u udhëhoq nga studiuesja italiane Arianna Capucetti dhe u koordinua nga Santiago González i Institute for Biomedical Research Bellinzona, në bashkëpunim me dymbëdhjetë grupe të tjera kërkimore ndërkombëtare. Eksperimentet u kryen te minjtë dhe u përqendruan në analizën e toksicitetit të pigmenteve më të zakonshme të tatuazheve.
Rezultatet tregojnë se, menjëherë pas realizimit të një tatuazhi, boja përhapet përmes sistemit limfatik dhe, brenda pak orësh, grumbullohet në sasi të konsiderueshme në nyjet limfatike. Kjo shkakton një reagim inflamator në dy faza: një fazë të hershme akute që zgjat rreth dy ditë dhe një fazë kronike, e cila mund të zgjasë për vite me radhë.
Faza kronike konsiderohet më problematike, pasi pigmentet e bojës thithen nga qelizat e sistemit imunitar, veçanërisht makrofagët. Këto qeliza përpiqen ta trajtojnë bojën si një substancë të huaj, por nuk arrijnë ta shpërbëjnë, duke çuar gradualisht në dëmtimin ose vdekjen e tyre. Ky proces është vërejtur veçanërisht me bojërat e kuqe dhe të zeza, të cilat rezultojnë më agresive për indet imunitare.
Sipas autorëve të studimit, pigmentet mbeten të bllokuara për një kohë shumë të gjatë në nyjet limfatike dhe vazhdojnë të “kapen” nga qeliza të reja të sistemit imunitar, duke dobësuar progresivisht aftësinë mbrojtëse të organizmit. Studimi sugjeron gjithashtu se ky proces mund të ulë efektivitetin e vaksinave, duke ndikuar në mënyrën se si trupi reagon ndaj tyre.
Edhe pse prej vitesh është diskutuar një lidhje e mundshme mes tatuazheve dhe rrezikut për sëmundje të caktuara, përfshirë tumore specifike, deri më tani nuk ishte arritur një përfundim i qartë. Ky hulumtim i ri nuk jep përgjigje përfundimtare, por hap një kapitull të rëndësishëm mbi sigurinë afatgjatë të tatuazheve dhe përbërësve të bojërave që përdoren.
Situata bëhet edhe më komplekse nga fakti se në praktikë përdoret një gamë shumë e gjerë pigmentesh, shpesh të përziera mes tyre. Autorët kujtojnë se monitorimi i tregut të bojërave për tatuazhe mbetet thelbësor, siç ndodhi në vitin 2022, kur disa substanca potencialisht kancerogjene çuan në tërheqjen e nëntë produkteve nga tregu italian.
Studiuesit theksojnë se nevojiten kërkime të mëtejshme për të kuptuar plotësisht rreziqet dhe për të zhvilluar pigmente dhe procedura më të sigurta, në një kohë kur tatuazhet janë bërë gjithnjë e më të përhapura, sidomos tek të rinjtë.
(Burimi: TGCOM)
