Një incident me armë zjarri ka ndodhur dje pranë mbikalimit të Rinasit, konkretisht në zonën e parkingut të qendrës tregtare “Megatek”. Sipas informacioneve paraprake, një person ka mbetur i plagosur si pasojë e të shtënave.
Konflikti mes dy personave dyshohet se ka nisur për motive banale, por ka degjeneruar kur njëri prej tyre ka nxjerrë armën dhe ka qëlluar tjetrin në këmbë.
Burime jozyrtare bëjnë me dije se i plagosuri është identifikuar si F. A, ndërsa personi i dyshuar për plagosjen është G.L.
Ndërkohë, autori është larguar menjëherë nga vendngjarja. Policia ka nisur këqyrjen e kamerave të sigurisë për të zbardhur më tej ngjarjen dhe për të bërë të mundur kapjen e autorit. I plagosuri nuk ka bashkëpunuar me forcat e rendit për sqarimin e plotë të rrethanave.
Njoftimi i Policisë:
Vorë/Informacion paraprak
Rreth orës 13:50, tek mbikalimi i Domjes, gjatë një konflikti për motive të dobëta dyshohet se është plagosur me armë zjarri në këmbë shtetasi F. A., rreth 25 vjeç, i cili ndodhet në spital, jashtë rrezikut për jetën si dhe është dëmtuar dyshohet me sende të forta shtetasi G. L., rreth 22 vjeç, i cili po merr mjekim në spital, jashtë rrezikut për jetën.
Shërbimet e Policisë kanë ngritur pika kontrolli në hyrje/dalje të kryeqytetit dhe vijojnë kontrollet në zonë e në ambiente të ndryshme, për kapjen e autorit/ve.
Ndërkohë, është ngritur një grup i posaçëm hetimor, i cili, nën drejtimin e Prokurorisë, po punon intensivisht për sqarimin e rrethanave dhe dokumentimin ligjor të rastit.
