Tetori njihet botërisht si muaji i ndërgjegjësimit për kancerin e gjirit, një periudhë e rëndësishme që i kushtohet informimit, parandalimit dhe mbështetjes për të gjitha gratë që përballen me këtë sëmundje.
Kjo fushatë globale, e simbolizuar nga shiriti rozë, synon të përçojë mesazhe të forta mbi rëndësinë e diagnostikimit të hershëm dhe trajtimit në kohë të kancerit të gjirit – një nga format më të përhapura të kancerit tek gratë në mbarë botën.
Kanceri i gjirit është formimi i qelizave kancerogjene në indet e gjirit. Ai mund të prekë gratë në çdo moshë, megjithëse rreziku rritet pas moshës 40 vjeç. Megjithatë, vitet e fundit ka pasur një shtim të rasteve edhe në moshat më të reja, gjë që e bën ndërgjegjësimin akoma më të rëndësishëm.
Shenjat paralajmëruese që nuk duhen neglizhuar
Zbulimi i hershëm shpëton jetë. Prandaj është jetike të jemi të vëmendshëm ndaj shenjave që mund të sinjalizojnë zhvillimin e kancerit të gjirit. Disa prej tyre përfshijnë:
- Një gungë e fortë në gji ose në zonën e sqetullës
- Ndryshime në formën ose madhësinë e gjirit
- Rrudhje ose tërheqje e lëkurës së gjirit
- Rrjedhje jo e zakonshme nga gjiri
- Skuqje, ënjtje ose ndjesi dhimbjeje në një zonë të gjirit
Nëse vëreni një ose më shumë nga këto shenja, është e domosdoshme të konsultoheni menjëherë me mjekun specialist. Kontrolli nuk do të thotë gjithmonë diagnozë negative – por çdo vonesë mund të ndikojë ndjeshëm në rrjedhën e trajtimit.
Në shumë qytete të Shqipërisë dhe në mbarë botën, gjatë Tetorit Rozë organizohen aktivitete sensibilizuese, ofrohen kontrolle mamografie falas, seminare dhe trajnime për vetëkontrollin e gjirit. Mjekët theksojnë se çdo grua mbi moshën 20 vjeç duhet të kryejë vetëkontroll mujor, ndërsa pas moshës 40 vjeç rekomandohet një mamografi çdo vit, në varësi të historisë familjare dhe faktorëve të tjerë të riskut.
Në këtë muaj, ngjyra rozë bëhet simbol i solidaritetit, i fuqisë dhe i shpresës. Është një kujtesë se kujdesi për shëndetin duhet të jetë prioritet për çdo grua. Të flasësh për kancerin e gjirit nuk është turp, është një hap drejt vetëdijes dhe jetës.
Fushatat e Tetorit Rozë nuk kanë vetëm qëllim informues, por edhe emocional – për të përkrahur të mbijetuarat, për të kujtuar ata që nuk ia dolën dhe për të ndihmuar të gjitha ato që po përballen sot me këtë sfidë të rëndë.
