TikTok njoftoi se po lançon një seksion të ri të quajtur “Local”, i cili do t’u shfaqë përdoruesve video nga biznese dhe shërbime pranë tyre, bazuar në të dhënat e sakta të vendndodhjes.
Sipas kompanisë, përdoruesit do të kenë një skedë të re në aplikacion ku mund të gjejnë përmbajtje mbi udhëtime, evente, restorante, blerje dhe postime nga krijues lokalë. Megjithatë, kjo skedë nuk do të jetë e disponueshme për personat nën 18 vjeç, për llogaritë private apo për ata që kanë kufizuar audiencën te “friends” ose “only you”.
Shërbimi vjen vetëm pak javë pasi platforma u përball me reagime negative për përditësimin e politikës së privatësisë në janar, ku theksohej se aplikacioni mund të mbledhë informacione të sakta për vendndodhjen nëse përdoruesit aktivizojnë shërbimet e lokacionit në pajisjet e tyre. Disa përdorues e cilësuan këtë praktikë si “ndërhyrëse”, megjithëse kompania sqaroi se gjurmimi mund të çaktivizohet në çdo kohë.
TikTok theksoi se ndarja e të dhënave të vendndodhjes është vullnetare dhe se shumë aplikacione moderne përdorin informacione të ngjashme për të ofruar përvoja më të personalizuara. “Kjo qasje u jep njerëzve mundësinë tё aktivizojnë kur duan informacion mbi përvoja pranё tyre, duke ruajtur kontrollin mbi të dhënat,” deklaroi kompania.
Gjurmimi i vendndodhjes është i çaktivizuar si parazgjedhje dhe, nëse aktivizohet, funksionon vetëm kur aplikacioni është në përdorim.
Ky zhvillim vjen pas ndryshimeve në strukturën e pronësisë së TikTok, të cilat u njoftuan po në janar, ditën kur platforma u nda nga pronari i mëparshëm, ByteDance. Struktura e re përfshin kompaninë e softuerëve Oracle, fondin e investimeve Silver Lake dhe firmën me bazë në Abu Dhabi MGX, që së bashku zotërojnë 45% të aksioneve.
Një tjetër 35% mbahet nga tetë investitorë të tjerë, përfshirë zyrën personale të investimeve të Michael Dell, ndërsa ByteDance ruan 19.9% të kompanisë — pak nën kufirin prej 20% të lejuar nga ligji federal.
(Burimi: CBS News)
