Këtë fundjavë, kryeqyteti kthehet në qendrën e inovacionit dhe bashkëpunimit ndërkombëtar me hapjen e Panairit të 31-të Ndërkombëtar të Tiranës – “Windows Into The Future”, organizuar nga Klik Ekspo Group në Pallatin e Kongreseve, nga 5 deri më 8 nëntor 2025.
Edicioni i këtij viti, i fokusuar në strategjitë dhe projektet e Shqipërisë 2030, sjell mbi 250 kompani nga më shumë se 20 vende, investitorë, sipërmarrës dhe liderë biznesi që bashkohen nën një çati për të ndarë ide, për të prezantuar inovacione dhe për të ndërtuar partneritete të reja.
Një program i pasur me tema bashkëkohore
Katër ditët e panairit mbartin një kalendar të larmishëm eventesh që përfshijnë konferenca ndërkombëtare, panele investimesh, prezantime projektesh strategjike dhe performanca artistike.
Në ditën e parë, aktivitetet nisin me ceremoninë zyrtare të hapjes, ku marrin pjesë përfaqësues të lartë të qeverisë, institucioneve dhe biznesit, të shoqëruar nga performanca artistike me soprano Eva Golemi dhe pianisten Etrita Ibrahimi.
Dita e dytë: ndërtimi i së ardhmes
E enjtja sjell diskutime mbi energjinë e gjelbër dhe tranzicionin e qëndrueshëm, me tema si Strategjia Kombëtare e Energjisë 2030, turizmi i qëndrueshëm, ekonomia rrethore dhe partneritetet publike-private.
Në mbrëmje, vizitorët mund të ndjekin Europtik Fashion Show, një spektakël mode dhe dizajni, dhe performancën muzikore të DJ Rea & Ema Popivoda, që bashkojnë pianon klasike me ritmet moderne elektronike.
Dita e tretë: investime, inovacion dhe kulturë
E premtja fokusohet te bujqësia inteligjente, siguria ushqimore, inovacioni teknologjik, si dhe zhvillimet më të fundit në sigurinë kibernetike dhe mbrojtjen e të dhënave.
Në orët e mbrëmjes, organizohet përurimi i librit “Lufta dhe Shqiptarët” nga Pëllumb Qazimi, si dhe nata gala me Ansamblin Kombëtar të Baletit, një shfaqje që ndërthur trashëgiminë kulturore shqiptare me artin modern.
Dita e fundit: arti dhe kultura e së ardhmes
E shtuna mbyll këtë edicion me një program kushtuar artit, kinemasë dhe skenës bashkëkohore. Në bashkëpunim me Teatrin Kombëtar të Operas dhe Baletit dhe Qendrën Kombëtare të Kinematografisë, do të zhvillohen prezantime mbi rolin e arteve në zhvillimin ekonomik dhe turizmin kulturor.
Në mbrëmje, atmosfera kulmon me “Muse-X Masked Ball”, një mbrëmje gala me muzikë live nga grupi The Rituals, që shënon mbylljen festive të panairit dhe shpalljen zyrtare të Muse-X 2026.
Një platformë bashkimi për biznesin dhe vizionin shqiptar
“Tirana International Fair 2025” shënon një hap të rëndësishëm drejt ndërtimit të një Shqipërie më inovative, të qëndrueshme dhe të hapur ndaj botës, duke u bërë një nga platformat më të mëdha të rrjetëzimit në rajon.
Për vizitorët e fundjavës, ky është destinacioni ideal për të parë nga afër sesi “E ardhmja ndërtohet sot”, mes teknologjisë, artit dhe bashkëpunimit ndërkombëtar.
