Detaje të reja tronditëse po dalin nga hetimi për zjarrin katastrofik në barin “Constellation” në resortin zviceran Crans-Montana, ku gjatë festimeve të Vitit të Ri humbën jetën 40 persona. Pronari francez i lokalit, Jacques Moretti, u ka thënë hetuesve se një derë shërbimi — që mund të kishte shërbyer si dalje shpëtimi — ishte e mbyllur nga brenda në momentin e zjarrit.
Moretti, bashkëpronar i lokalit, u dёrgua në paraburgim të premten, ndërsa prokuroria e kantonit Valais po heton rrethanat e tragjedisë. Sipas deklarimeve të tij, ai mësoi për derën e bllokuar vetëm pasi mbërriti në vendngjarje. Kur arriti, e hapi me forcë dhe gjeti disa persona të shtrirë pas saj, sipas fragmenteve nga raportet policore të publikuara në media franceze dhe zvicerane dhe të konfirmuara për AFP nga burime pranë hetimit.
Gjetjet paraprake sugjerojnë se zjarri u shkaktua nga fishekzjarrë që ranë në kontakt me shkumën izoluese akustike të instaluar në tavanin e bodrumit të lokalit. Hetuesit po shqyrtojnë gjithashtu nëse bari kishte fikëse zjarri funksionale dhe të aksesueshme, si dhe nëse daljet ishin në përputhje me rregulloret e sigurisë.
Bashkëshortja dhe bashkëpronarja e lokalit, Jessica Moretti, e cila u lirua pas seancës dëgjimore, deklaroi se në restorant përdornin xixa të ndezura gjatë shërbimit të verës. Megjithatë, Jacques Moretti tha se kishte kryer teste dhe se xixat nuk kishin fuqi të mjaftueshme për të ndezur shkumën akustike. Ai pranoi se materialin izolues e kishte blerë vetë në një dyqan për punime shtëpiake dhe e kishte instaluar personalisht gjatë rinovimit të lokalit në vitin 2015.
Një tjetër pikë e hetimit lidhet me praninë e të miturve në lokal në natën e tragjedisë. Moretti deklaroi se hyrja për personat nën 16 vjeç ishte e ndaluar, ndërsa ata 16–18 vjeç duhej të shoqëroheshin nga një i rritur. Ai tha se kishte dhënë udhëzime të qarta stafit të sigurisë, por pranoi se “është e mundur që protokolli të jetë shkelur”.
Çifti Moretti dyshohet zyrtarisht për vrasje nga pakujdesia, dëmtim trupor nga pakujdesia dhe zjarrvënie nga pakujdesia, ndërsa hetimet vazhdojnë për të përcaktuar përgjegjësitë konkrete në njërën nga tragjeditë më të rënda të viteve të fundit në Zvicër.
(Burimi: The Guardian)
