Si ta riktheni “dhimbjen e pagesës” dhe të shmangni blerjet impulsive
A ju ka ndodhur të pendoheni për një blerje të bërë me nxitim? Të habiteni kur shihni faturën e kartës së kreditit? Nuk jeni të vetëm. Shumë njerëz luftojnë me shpenzimet impulsive, të cilat shpesh çojnë në borxhe dhe stres financiar.
Psikologjia tregon se problemi nuk është vetëm mungesa e disiplinës, por mënyra se si truri ynë e përjeton pagesën. Ja tre strategji të thjeshta, të mbështetura në studime shkencore, që mund t’ju ndihmojnë të merrni kontrollin.
Riktheni “dhimbjen e pagesës”
Studimet e neuroshkencës tregojnë se pagesa shkakton realisht një lloj shqetësimi psikologjik. Një hulumtim i udhëhequr nga Brian Knutson zbuloi se çmimet e larta aktivizojnë në tru zonën e lidhur me dhimbjen. Sa më e dukshme të jetë pagesa, aq më e fortë është kjo ndjesi dhe aq më pak ka gjasa të shpenzojmë.
Pagesat pa kontakt, telefonat dhe kartat e kreditit e “vёnё nё gjumё” këtë ndjesi, duke na shtyrë të shpenzojmë më shumë. Prandaj:
- Mbani shënim çdo blerje, edhe nëse paguani me kartë
- Vendoseni kartën në një vend të vështirë për t’u nxjerrë
- Për blerje online, mbajeni kartën në një dhomë tjetër
- Për një kontroll më të fortë, përdorni vetëm pagesё me para nё dorё për një ditë
Mendoni: pse jo?
Kur shohim një produkt, truri ynë fillon automatikisht të mbledhë arsye pse duhet ta blejmë. Psikologët e quajnë këtë “Query Theory”: argumentet që vijnë të parat kanë më shumë peshë.
Ndryshojeni këtë rend:
Sa herë që tundoheni të blini diçka, ndaloni dhe mendoni qëllimisht dy arsye pse nuk duhet ta blini. Shpesh, vetëm kjo ndalesë e vogël mjafton që dëshira të shuhet.
Prisni dy ditë
Krijoni një listë me gjёra “Ҫfarё do blej”. Kur vendosni të blini diçka jo thelbësore, mos e blini menjëherë. Shënojeni në listë me datë dhe, nëse doni, me linkun e produktit.
Rregulli është i thjeshtë: blerjet kryhen vetëm pas dy ditësh. Kjo kohë ftoh emocionet dhe shpesh e shndërron blerjen nga kënaqësi në një “detyrë”, duke bërë që shumë impulse të zhduken vetë.
Këto teknika mund të përdoren veçmas ose së bashku. Nëse dëshironi ndryshim të fortë, kombinimi i tyre mund të sjellë rezultate të dukshme në një kohë të shkurtër.
(Burimi: Psychology Today)
