Një ndër violinistët më të spikatur dhe karizmatikë të skenës ndërkombëtare, Olen Çesari, rikthehet përpara publikut shqiptar me një seri koncertesh që pritet të sjellin emocione të forta dhe një eksperiencë të veçantë artistike.
I dalluar për stilin e tij origjinal, ku ndërthuren virtuoziteti klasik me elementë modernë, Çesari arrin të krijojë një komunikim të drejtpërdrejtë dhe të ndjerë me publikun.
Në skenën e Pallatit të Kongreseve, më 9, 10 dhe 11 prill, ai do të vijë i shoqëruar nga Orkestra Simfonike e RTSH, si edhe nga një grup artistësh të njohur shqiptarë dhe ndërkombëtarë, duke premtuar një atmosferë të pasur muzikore dhe plot energji.
Mes të ftuarve specialë do të jenë Dren Abazi, Lavinia Mancusi, Enrico Giaretta, Zyliha Miloti, Carlos Paz dhe Roland Cenko, të cilët do të sjellin interpretime të veçanta dhe do t’i japin mbrëmjeve një dimension të larmishëm artistik.
“Mezi po presim këtë moment dhe jemi shumë të lumtur që ky koncert po realizohet në Tiranën tonë. Kemi përgatitur një repertor të jashtëzakonshëm, rreth dy orë spektakël me orkestrën e RTSH, që tingëllon si një album i mirëfilltë. Do të kemi shumë të ftuar nga vende të ndryshme, nga Italia e deri në Ekuador, si dhe artistë të muzikës popullore. Një kënaqësi e veçantë është prania e Zyliha Milotit, që do t’i japë një ëmbëlsi të rrallë këtij koncerti”, u shpreh Çesari.
Këto koncerte pritet të shndërrohen në një festë të vërtetë muzikore, ku ndërthuren tradita dhe moderniteti, duke krijuar një hapësirë të mbushur me emocione, ritëm dhe bashkëpunim artisti, tre mbrëmje që synojnë të mbeten gjatë në kujtesën e publikut artdashës.
