Një tren pasagjerësh me shpejtësi të lartë ka përplasur një tufë elefantësh të egër në shtetin Assam, në verilindje të Indisë, duke shkaktuar vdekjen e shtatë elefantëve aziatikë dhe plagosjen e një këlyshi, njoftuan autoritetet lokale.
Sipas zëdhënësit të Hekurudhave Indiane, drejtuesi i trenit vuri re një tufë me rreth 100 elefantë që po kalonin shinat dhe aktivizoi frenat e emergjencës, por treni nuk arriti të ndalej në kohë dhe goditi disa prej tyre.
Si pasojë e përplasjes, lokomotiva dhe pesë vagona dolën nga shinat. Megjithatë, fatmirësisht nuk pati viktima apo të lënduar mes pasagjerëve. Në tren ndodheshin rreth 650 persona.
Veterinerët kryen autopsitë e elefantëve të ngordhur, ndërsa trupat e tyre u varrosën më vonë gjatë ditës. Aksidenti ndodhi në një zonë pyjore, rreth 125 kilometra në juglindje të qytetit Guwahati, kryeqyteti i shtetit Assam. Sipas Hekurudhave Indiane, zona nuk ishte e klasifikuar zyrtarisht si korridor për elefantët, megjithëse këto kafshë kalojnë shpesh shinat në këtë rajon.
Treni Rajdhani Express po udhëtonte nga shteti Mizoram, në kufi me Mianmarin, drejt kryeqytetit të Indisë, Nju Delhi. Pas aksidentit, vagonët që nuk kishin dalë nga shinat u shkëputën dhe treni vazhdoi udhëtimin. Rreth 200 pasagjerë që ndodheshin në vagonët e dëmtuar u transportuan drejt Guwahati-t me një tren tjetër.
Përplasjet mes trenave dhe elefantëve nuk janë të rralla në Assam, i cili është shtëpia e rreth 7,000 elefantëve aziatikë të egër, një nga përqendrimet më të mëdha në Indi. Që nga viti 2020, të paktën 12 elefantë janë vrarë nga trenat me shpejtësi në këtë shtet.
Gjatë kësaj periudhe të vitit, elefantët e egër shpesh afrohen pranë zonave të banuara nga njerëzit, pasi fushat me oriz janë gati për korrje, gjë që rrit rrezikun e përplasjeve të tilla tragjike.
(Burimi: CNN)
