Ish-lideri i partisë Reform UK në Uells, Nathan Gill, u dënua me 10 vite e gjysmë burg nga Gjykata Qendrore e Londrës, pasi pranoi se kishte marrë mijëra euro ryshfet për të bërë deklarata pro-Rusi në Parlamentin Europian. Gjykatësja Bobbie Cheema-Grubb deklaroi se Gill, 52 vjeç, “abuzoi me një pozicion të rëndësishëm autoriteti dhe besimi”, duke vepruar në shërbim të interesave të huaja dhe duke komprometuar integritetin e një institucioni ndërkombëtar.
Sipas hetimit të Policisë Kundër Terrorizmit, Gill mori pagesa nga politikanët pro-rusë në Ukrainë ndërmjet dhjetorit 2018 dhe korrikut 2019, përfshirë Oleg Voloshyn, i cili më vonë u sanksionua nga SHBA dhe u akuzua për tradhti në Ukrainë. Në këmbim të parave, Gill pranoi se kishte mbajtur fjalime të hartuara nga pala ruse, kishte bërë paraqitje të koordinuara televizive dhe kishte përfshirë anëtarë të tjerë të Parlamentit Europian.
“Ju pranuat pagesa nga shtetas të huaj, përdorët materiale të gatshme si të ishin tuajat dhe manipuluat punën e kolegëve tuaj në çështje të ndjeshme ndërkombëtare”, theksoi gjykatësja.
Gill, i zgjedhur fillimisht në Parlamentin Europian me partinё e Nigel Farage dhe më pas me partinë Brexit, u ndalua në aeroportin e Mançesterit në vitin 2021 ndërsa përpiqej të udhëtonte drejt Rusisë. Ai u akuzua zyrtarisht në shkurt të këtij viti dhe në shtator pranoi fajësinë për tetë akuza korrupsioni.
Policia deklaroi se në telefonin e tij u gjetën komunikime të koduara me Voloshyn, ku diskutoheshin transaksionet financiare dhe përfshirja e eurodeputetëve të tjerë britanikë dhe holandezë.
Partia Reform UK e cilësoi veprimin e tij si “të turpshëm dhe të pafalshëm”, duke theksuar se Gill nuk është më anëtar i kёsaj force politike. Ndërkohë, Farage, drejtues aktual i Reform UK, i cili kryeson kohёt e fundit nёpёr sondazhe, deklaroi se nuk kishte dijeni për veprimtarinë e ish-bashkëpunëtorit të tij—një çështje që rrezikon të shkaktojë pasoja politike përballë akuzave të vazhdueshme se ai ka qëndrim të butë ndaj Moskës pas pushtimit të Ukrainës nga Rusia në shkurt 2022.
Gill largohet nga skena politike me damkën e një skandali të rëndë që ka zgjatur me vite dhe ka tronditur themelet e besimit publik në institucionet demokratike ndërkombëtare.
(Burimi: Aljazeera)
