Presidenti i SHBA-së, Donald Trump, nënshkroi të hënën një urdhër ekzekutiv që klasifikon “fentanilin e paligjshëm dhe kimikatet e tij bazë pararendëse” si armë të shkatërrimit në masë.
“Me këtë urdhër historik po hedhim një tjetër hap për të mbrojtur amerikanët nga plaga e fentanilit vdekjeprurës që po përmbyt vendin tonë,” deklaroi Trump nga Zyra Ovale, duke shtuar: “Asnjë bombë nuk bën atë që po bën kjo.”
Nënshkrimi i urdhrit u bë gjatë një ceremonie ku presidenti po nderonte anëtarë të forcave të armatosura amerikane me medalje, për rolin e tyre në mbrojtjen e kufirit amerikan.
Sipas urdhrit ekzekutiv, Prokurorja e Përgjithshme Pam Bondi udhëzohet të “fillojё menjëherë hetime dhe ndjekje penale ndaj trafikimit të fentanilit”. Po ashtu, Sekretari i Shtetit Marco Rubio dhe Sekretari i Thesarit Scott Bessent ngarkohen të ndërmarrin masa kundër aseteve dhe institucioneve financiare që, në përputhje me ligjin, përfshihen ose mbështesin prodhimin, shpërndarjen dhe shitjen e fentanilit të paligjshëm dhe kimikateve të tij bazë.
Sipas përkufizimit të Zyrës së Kombeve të Bashkuara për Çarmatimin, armët e shkatërrimit në masë përfshijnë mjete që kanë potencialin të shkaktojnë vdekje ose lëndime të rënda përmes substancave toksike apo helmuese, si dhe armë që mund të prodhojnë në një moment të vetëm shkatërrim masiv, duke rrezikuar jetën e miliona civilëve dhe mjedisin natyror.
Ndërkohë, të dhënat federale të publikuara në maj tregojnë se vdekjet nga mbidoza e drogës në SHBA shënuan vitin e kaluar rënien më të madhe në pesë vitet e fundit. Megjithatë, opioidet sintetike – kryesisht fentanili – vazhdojnë të jenë fatale.
Sekretari amerikan i Mbrojtjes, Pete Hegseth, deklaroi se eventi i së hënës në Shtëpinë e Bardhë shënoi edhe rikthimin e medaljes së “Shërbimit në Kufirin Meksikan”, e cila, sipas tij, ishte krijuar fillimisht nga Kongresi në vitin 1918.
“Burrat dhe gratë tona do të mbajnë të njëjtën medalje që mbanin amerikanët 100 vjet më parë, të cilëve u ishte kërkuar të mbronin sovranitetin e vendit,” u shpreh Hegseth.
(Burimi: CNN)
