Presidenti amerikan Donald Trump do të drejtojë sot mbledhjen e parë të të ashtuquajturit “Bordi i Paqes”, një nismë e re diplomatike që synon rindërtimin e Gazës dhe vendosjen e një force stabilizimi ndërkombëtare në territor. Sipas mediave amerikane, takimi pritet të zhvillohet me format të ngjashëm me mbledhjet e kabinetit presidencial.
Trump ka paralajmëruar “njoftime të mëdha”, përfshirë angazhime financiare që, sipas tij, kapin mbi 5 miliardë dollarë për ndihmë humanitare dhe rindërtim, si dhe mijëra trupa për një Forcë Ndërkombëtare Stabilizimi (ISF), e cila do të mbështesë sigurinë në Gaza dhe do të lejojë tërheqjen graduale të Izraelit nga territori.
Në këtë takim pritet të marrin pjesë përfaqësues nga vende si Katari, Arabia Saudite, Egjipti, Emiratet e Bashkuara Arabe, Izraeli, Pakistani, Indonezia, Hungaria dhe Bjellorusia. Megjithatë, shumica e aleatëve tradicionalë europianë të SHBA-së kanë refuzuar anëtarësimin e plotë dhe do të përfaqësohen vetëm në nivel vëzhguesish ose me zyrtarë të nivelit të mesëm.
Sipas Shtëpisë së Bardhë, mbi 20 vende pritet të jenë të pranishme, por shumë prej tyre do të përfaqësohen nga ministra të jashtëm dhe jo nga krerë shtetesh, edhe për shkak të përkimit të takimit me fillimin e muajit të Ramazanit.
Në mbledhjen inauguruese pritet të flasë vetë Presidenti Donald Trump, i cili do ta drejtojë takimin, si dhe Sekretari amerikan i Shtetit Marco Rubio, i dërguari special Steve Witkoff, ambasadori i SHBA-së në OKB Mike Waltz, Jared Kushner dhe ish-kryeministri britanik Tony Blair, pjesë e komitetit ekzekutiv të Bordit. Sipas burimeve amerikane, vendeve pjesëmarrëse do t’u jepen rreth dy minuta secilit për të mbajtur fjalën, ndërsa Trump mund t’u kërkojë disa delegacioneve komente ose përditësime specifike mbi çështjet e sigurisë, ndihmës humanitare dhe administrimit të Gazës.
Në fokus të diskutimeve do të jenë çështjet e sigurisë, ndihma humanitare, krijimi i një komiteti teknokratik palestinez për administrimin e Gazës dhe formimi i forcës stabilizuese me mandat të mbështetur nga OKB-ja. Sipas burimeve amerikane, SHBA po planifikon një forcë me rreth 20 mijë trupa, por deri më tani nuk ka angazhime publike përfundimtare nga qeveritë për dërgimin e trupave.
Një nga temat më delikate që pritet të dominojë diskutimet është çarmatimi i Hamasit, i cili mbetet një nga pengesat kryesore për zbatimin e planit të paqes. Zyrtarë amerikanë pranojnë se ky proces do të jetë afatgjatë dhe kompleks.
Takimi zhvillohet në një moment tensioni të lartë rajonal, me rritje të pranisë ushtarake amerikane në Lindjen e Mesme dhe paralajmërime nga Trump për veprime të mundshme kundër Iranit nëse nuk arrihet një marrëveshje për programin bërthamor.
Ndërkohë, disa diplomatë shprehin shqetësim se “Bordi i Paqes” mund të funksionojë si një strukturë paralele ndaj Kombeve të Bashkuara, ndonëse Trump ka deklaruar se nisma do të bashkëpunojë me OKB-në dhe mund të zgjerohet përtej çështjes së Gazës.
Ky takim shihet nga disa vende si një mundësi reale për të shtyrë përpara procesin e rindërtimit dhe stabilizimit të Gazës, ndërsa të tjerë mbeten skeptikë për efektivitetin dhe përfshirjen e plotë ndërkombëtare në këtë nismë.
(Burimi: CNN)
