Avionët e rinj që do të shërbejnë si Air Force One do të lyhen me ngjyrat e preferuara të Presidentit Donald Trump. Bëhet fjalë për dy Boeing 747 të modifikuar, të njohur ushtarakisht si VC-25B, të cilët do të kenë një skemë me të kuqe, të bardhë, të artë dhe blu të errët — dizajn i propozuar gjatë mandatit të parë të Trump, por i refuzuar më pas nga administrata Biden.
“Air Force One do të jetë i pabesueshëm… do të jetë më i miri në botë. Dhe do të jetë i kuq, i bardhë dhe blu”, kishte deklaruar Trump në vitin 2018, duke theksuar se kombinimi ishte “i përshtatshëm”.
Që nga administrata e John F. Kennedy, avionët presidencialë janë identifikuar me ngjyrat klasike blu dhe të bardhë. Propozimi i Trump në atë kohë nxiti komente se dizajni i ri i afrohej ngjyrave të avionit të tij personal Boeing 757. Në vitin 2022, Forcat Ajrore, gjatë administratës Biden, e hodhën poshtë ndryshimin, duke përmendur arsye teknike dhe kostoje. Sipas një zëdhënësi të asaj kohe, analizat kishin treguar se ngjyrat më të errëta në pjesën e poshtme të avionit mund të rrisnin temperaturën përtej kufijve të lejuar për disa komponentë.
Në vitin 2023 u propozua një dizajn alternativ më pranë skemës tradicionale blu, me një nuancë pak më të errët. Megjithatë, pas rizgjedhjes së Trump, ideja e tij fillestare u rikthye në qendër të vëmendjes. Modeli i avionit me ngjyrat e reja u shfaq në mbrëmjen e inaugurimit mbi një tortë ceremoniale dhe më pas është parë edhe si maket në Zyrën Ovale.
Sipas Forcave Ajrore, skema e re do të aplikohet jo vetëm në dy Boeing 747 që po modifikohen nga kompania Boeing, por edhe në një 747 të dhuruar ushtrisë amerikane nga Katari, i cili do të përshtatet për përdorim presidencial dhe mund të nisë fluturimet që këtë verë. Ngjyrat do të aplikohen gjithashtu gjatë mirëmbajtjes së planifikuar në katër avionë më të vegjël C-32, version ushtarak i Boeing 757 që aktualisht është pjesë e flotës.
Një prej avionëve C-32 me skemën e re të ngjyrave është fotografuar duke u ngritur nga Greenville, Teksas, ndërsa Forcat Ajrore kanë konfirmuar se ai pritet të dorëzohet brenda pak muajsh.
Vendimi shënon një kthesë të qartë nga kursi i ndjekur gjatë administratës së mëparshme dhe rikthen në vëmendje simbolikën vizuale që Trump dëshiron t’i japë jo vetёm avionit presidencial amerikan, por gjithҫkaje qё e rrethon.
(Burimi: CNN)
