Presidenti i Shteteve të Bashkuara, Donald Trump, ka paralajmëruar Iranin për goditje edhe më të forta në ditët në vijim, ndërsa Uashingtoni u ka bërë thirrje urgjente qytetarëve amerikanë të largohen menjëherë nga një sërë vendesh në Lindjen e Mesme për shkak të “rreziqeve serioze të sigurisë”.
Në një intervistë për CNN, Trump deklaroi se “vala e madhe” e sulmeve ende nuk ka ndodhur dhe se operacionet ushtarake janë vetëm në fazën fillestare. Sipas tij, konflikti pritet të zgjasë rreth katër deri në pesë javë, por ai paralajmëroi se mund të zgjasë edhe më shumë. Një zyrtar i lartë amerikan tha se Uashingtoni po përgatitet për një rritje të ndjeshme të intensitetit të sulmeve brenda 24 orëve të ardhshme, pasi faza e parë ka synuar dobësimin e mbrojtjes ajrore iraniane, ndërsa faza e dytë do të fokusohet në shkatërrimin e kapaciteteve të prodhimit të raketave, dronëve dhe aftësive detare të Iranit.
Në të njëjtën kohë, Komanda Qendrore e SHBA-së konfirmoi se gjashtë ushtarë amerikanë humbën jetën në një sulm iranian ndaj trupave amerikane në Kuvajt. Situata në rajon mbetet jashtëzakonisht e tensionuar, me Izraelin që ka raportuar lëshime të reja raketash nga territori iranian drejt veriut të vendit, ndërsa sirenat e alarmit janë aktivizuar në disa zona.
Departamenti Amerikan i Shtetit lëshoi një paralajmërim të fortë për qytetarët amerikanë që ndodhen në Bahrein, Egjipt, Iran, Irak, Izrael, Bregun Perëndimor dhe Gaza, Jordani, Kuvajt, Liban, Oman, Katar, Arabinë Saudite, Siri, Emiratet e Bashkuara Arabe dhe Jemen, duke u kërkuar të largohen menjëherë përmes fluturimeve komerciale sa kohë ato janë të disponueshme. Autoritetet amerikane kanë vënë në dispozicion linja emergjente 24 orë për ndihmë konsullore, ndërsa shumë vende në rajon më herët kishin këshilluar qytetarët të strehohen në vende tё sigurta.
Në terren, media shtetërore iraniane raportoi se mbi 100 anije civile në portin Jask, në provincën Hormozgan, janë përfshirë nga flakët si pasojë e sulmeve amerikano-izraelite. Fotografi të shpërndara në rrjetet sociale tregojnë kolona të mëdha tymi të zi, por këto pretendime nuk janë verifikuar në mënyrë të pavarur. Autoritetet amerikane dhe izraelite nuk kanë komentuar mbi këto raportime.
Paralelisht, një këshilltar i lartë i Gardës Revolucionare Islamike paralajmëroi se anijet që kalojnë përmes Ngushticës së Hormuzit mund të bëhen objektiv, duke rritur frikën për përshkallëzim në një nga korridoret më të rëndësishme energjetike në botë.
Sekretari amerikan i Shtetit, Marco Rubio, deklaroi se kërcënimi “i menjëhershëm” nga Irani lidhej me një reagim të pritshëm ndaj veprimeve ushtarake izraelite dhe se SHBA vendosi të veprojë paraprakisht për të shmangur viktima më të mëdha. Ai theksoi se objektivi i operacionit është shkatërrimi i kapaciteteve balistike të Iranit dhe parandalimi i rikthimit të tyre, si dhe pengimi i çdo programi bërthamor ushtarak. Rubio shtoi se SHBA nuk do të kundërshtonte një ndryshim regjimi në Teheran, por se qëllimi zyrtar mbetet neutralizimi i kërcënimit ushtarak.
Ndërkohë, Izraeli paralajmëroi se kapaciteti i Iranit për të lëshuar raketa balistike pritet të goditet ndjeshëm brenda 24 orëve, ndërsa konflikti po zgjerohet në disa fronte. Izraeli ka lëshuar paralajmërime evakuimi për zona në Liban, duke rritur shqetësimin për përfshirje më të gjerë rajonale.
Situata në Iran mbetet e paqartë, edhe për shkak të problemeve të mëdha me internetin në mbarë vendin, çka e bën të vështirë komunikimin me qytetarët. Megjithatë, raportimet flasin për rritje të ankthit dhe pasigurisë mes popullsisë, sidomos pas vrasjes së Udhëheqësit Suprem Ajatollah Ali Khamenei në sulmet e fundit.
Me paralajmërime për sulme të reja, humbje ushtarake të konfirmuara dhe thirrje për largim urgjent të civilëve amerikanë nga rajoni, konflikti po hyn në një fazë të re dhe potencialisht më të rrezikshme, ndërsa komuniteti ndërkombëtar përballet me rrezikun e një përshkallëzimi të mëtejshëm në Lindjen e Mesme.
(Burimi: CNN)
