Qendra prestigjioze për artet interpretuese “John F. Kennedy” në Uashington DC do të ndërpresë aktivitetet argëtuese për rreth dy vjet, duke nisur nga 4 korriku, për shkak të një procesi rinovimi. Lajmi u bë i ditur nga Donald Trump përmes një postimi në platformën Truth Social.
Sipas tij, pas një vlerësimi njëvjeçar mbi të ardhmen e institucionit, zgjedhja më e shpejtë për ta rikthyer qendrën në “nivelin më të lartë të suksesit, bukurisë dhe madhështisë” është mbyllja e përkohshme e aktiviteteve, me një rihapje madhështore që – sipas Trump – do të tejkalojë çdo inaugurim të mëparshëm të një objekti të tillë. Vendimi mbetet i kushtëzuar nga miratimi i bordit drejtues.
Qendra ka qenë në trazira që prej shkurtit 2025, kur Trump riorganizoi bordin dhe u emërua vetë kryetar i institucionit.
Historikisht, Qendra Kennedy ka pritur mbi 2,000 evente në vit, por muajt e fundit është përballur me anulime të shumta dhe rënie të ndjeshme të shitjeve të biletave. Një analizë e Washington Post tregoi se 43% e biletave për prodhime të zakonshme mbetën të pashitura vitin e kaluar.
Ndër artistët që janë tërhequr nga shfaqjet janë producenti i “Hamilton”, Jeffrey Seller, aktorja dhe producentja Issa Rae, fituesja e Grammy Rhiannon Giddens, Peter Wolf dhe grupi rock Low Cut Connie. Seller deklaroi se shfaqja nuk mund të ishte pjesë e “kulturës së re” që po i imponohej institucionit.
Dorëheqje ka pasur edhe në nivele drejtuese: producentja Shonda Rhimes u largua nga bordi, ndërsa sopranoja Renée Fleming dhe muzikanti Ben Folds hoqën dorë nga rolet si këshilltarë artistikë.
Në dhjetor, bordi i ri – i përzgjedhur nga Trump – votoi për riemërtimin e institucionit në “Qendra Trump-Kennedy”. Megjithatë, sipas ligjit, emri mbetet “Qendra John F. Kennedy për Artet Performuese”, një memorial i gjallë për ish-presidentin amerikan, pasi shumica pretendojnё se çdo ndryshim emri duhet të kërkojë miratimin e Kongresit.
Ndërkohë, Opera Kombëtare e Uashingtonit njoftoi se do të zhvendosë shfaqjet e saj pas më shumë se katër dekadash në këtë skenë – një tjetër sinjal i krizës që po kalon institucioni kulturor.
