Galeria Kombëtare e Portreteve në Uashington DC ka hequr nga ekspozita një pankartë informuese që përmendte dy nismat pёr shkarkimin e Donald Trump nga detyra dhe sulmin e mbështetësve të tij në Kapitol më 6 janar 2021. Lëvizja vjen paralelisht me zëvendësimin e portretit të mëparshëm të Trump me një imazh të ri: ish-presidenti shfaqet në Zyrën Ovale, me vështrim të vrenjtur dhe grushtet e mbështetura mbi tavolinë.
Ekspozita “Presidentët e Amerikës”, pjesë e Institutit Smithsonian, prezanton portretet e të gjithë presidentëve amerikanë. Deri së fundmi, pranë portretit të Trump ishte vendosur një mbishkrim ku thuhej:
“Ndaj tij janё ngritur dy herë akuza për abuzim me pushtetin dhe nxitje të kryengritjes pasi mbështetësit sulmuan Kapitolin e SHBA-së më 6 janar 2021. Senati e liroi nga akuzat në të dyja rastet.”
Ky tekst tashmë është hequr.
Sipas raportimeve, vendimi për ndryshimin e portretit dhe largimin e përshkrimit vjen në një klimë të përpjekjeve të vazhdueshme të Trump për të ushtruar ndikim mbi institucionet kulturore federale, veçanërisht Smithsonian, dhe për të riformatuar mënyrën si publiku amerikan kujton ngjarjet e 6 janarit.
Në maj, Trump deklaroi se kishte shkarkuar drejtoreshën e galerisë, Kim Sajet, duke e cilësuar atë “shumë partiake” dhe dhe e papërshtatshme për postin. Bordi drejtues i muzeut e rrëzoi përpjekjen, duke theksuar se vendimet për personelin janë në kompetencën e tyre. Megjithatë, Sajet përfundimisht dha dorëheqjen.
Heqja e mbishkrimit në Galerinë Kombëtare të Portreteve nuk është rast i izoluar. Në korrik, edhe Muzeu Kombëtar i Historisë Amerikane hoqi referencat për dy nsimat pёr shkarkim tё Trumpit nga ekspozitat e tij. Ndërkohë, në mars, Trump nënshkroi një urdhër ekzekutiv që ndalon Smithsonianin të financojë ekspozita ose programe që, sipas formulimit të dekretit, “degradojnë vlerat e përbashkëta amerikane, ndajnë amerikanët mbi baza racore ose promovojnë ideologji të papajtueshme me ligjin federal”.
Trump ka treguar prej kohësh ndjeshmëri të veçantë ndaj mënyrës si paraqitet vizualisht. Vitin e kaluar, ai u ankua publikisht për një pikturë të tij në kryeqytetin e shtetit të Kolorados, duke e quajtur “të shtrembëruar qëllimisht” dhe “më të keqen”. Disa muaj më vonë, ajo pikturë u zëvendësua me një tjetër.
Në shtator, ai shtoi gjithashtu një “Shëtitore të Famës Presidenciale” në ambientet e jashtme të Shtëpisë së Bardhë, me portrete të të gjithë presidentëve të mëparshëm — me një përjashtim domethënës: Joe Biden. Në vend të tij u vendos një fotografi e një lapsi automatik me emrin e Biden, si referencë ndaj pretendimit të përsëritur të Trump se Biden nuk ishte ai që merrte realisht vendimet në Shtëpinë e Bardhë.
Sipas Washington Post, pllakata e re pranë portretit të Trump në Galerinë Kombëtare të Portreteve ka një mbishkrim aq të shkurtër, sa forma e tabelës së vjetër ende dallohet në mur poshtë saj. Tani aty shënohen vetëm vitet e qëndrimit të Trump në detyrë.
Zëdhënësja e galerisë, Concetta Duncan, i tha Washington Post se muzeu po “eksploron etiketime më pak përshkruese” për disa ekspozita dhe se portreti i Trump në këtë galeri është ndryshuar edhe më parë. Portreti i mëparshëm e tregonte Trump me fytyrë serioze, duke qëndruar me duart e bashkuara përpara. Mbishkrimi i atëhershëm përfshinte gjithashtu informacione mbi emërimin e tre gjyqtarëve të Gjykatës Supreme dhe zhvillimin e vaksinave kundër Covid-19 gjatë mandatit të tij të parë.
(Burimi: The Guardian)
