Presidenti amerikan Donald Trump njoftoi vendosjen e një tarife globale prej 10% mbi importet, vetëm pak orë pasi Gjykata e Lartë rrëzoi si të paligjshme tarifat e tij të gjera të vendosura përmes kompetencave emergjente.
Vendimi 6-3 i Gjykatës Supreme konstatoi se Trump kishte tejkaluar autoritetin e tij duke përdorur Aktin për Fuqitë Ekonomike në Rast Emergjence (IEEPA) të vitit 1977 për të vendosur tarifa pothuajse ndaj çdo partneri tregtar të SHBA-së. Në shumicë u bashkuan edhe dy gjyqtarë konservatorë, Amy Coney Barrett dhe Neil Gorsuch, përkrah Kryetarit të Gjykatës John Roberts dhe tre gjyqtarëve liberalë.
Reagimi i presidentit ishte i ashpër. Ai i quajti gjyqtarët që votuan kundër tij “një turp për kombin” dhe paralajmëroi se do të vazhdojë betejën ligjore. Trump vuri në pikëpyetje edhe çështjen e rimbursimeve, duke sugjeruar se procesi për kthimin e miliarda dollarëve të mbledhura nga tarifat mund të zgjasë “dy apo edhe pesë vjet” në gjykata.
Tarifa e re 10% që ai shpalli mund të hyjë në fuqi për një periudhë maksimale 150-ditore, përveç nëse Kongresi miraton një zgjatje. Administrata ka sinjalizuar se do të përdorë baza të tjera ligjore për të ruajtur presionin tregtar, megjithëse këto mekanizma kërkojnë zakonisht hetime formale dhe zbatohen më shumë në sektorë specifikë.
Nga ana tjetër, ekspertët paralajmërojnë se një boshllëk i mundshëm në të ardhurat nga tarifat mund të ndikojë në deficitin federal. Administrata kishte parashikuar që tarifat do të kompensonin një pjesë të konsiderueshme të kostos së uljeve të taksave të miratuara vitin e kaluar. Sipas disa analizave, tarifat e rrëzuara pritej të sillnin rreth 1.4 trilionë dollarë në një dekadë, ndërsa skema e re 10% mund të gjenerojë rreth 800 miliardë dollarë në të njëjtën periudhë.
