Me ardhjen e dimrit, nuk ndryshojnë vetëm temperaturat dhe mënyra si visheni — sipas një eksperteje të ushqyerjes, duhet të ndryshojë edhe orari i darkës. Catherine Norton, profesoreshë e ushqyerjes në Universitetin e Limerickut, shpjegon se gjatë stinës së ftohtë është më e shëndetshme të hamë darkë më herët, për të mbështetur mirëqenien fizike dhe mendore.
Ajo thotë se ditët e shkurtra na prishin ritmin biologjik dhe shumë njerëz përfundojnë duke ngrënë vonë në mbrëmje, por në fakt duhet të bëjnë të kundërtën. Sipas Norton, t’i kushtojmë vëmendje orës së vakteve është po aq e rëndësishme sa t’i kushtojmë vëmendje ushqimit që hamë. Kur hamë më herët, trupi funksionon më mirë: tretja bëhet më lehtë, hormonet që ndihmojnë gjumin lëshohen në kohën e duhur dhe metabolizmi nuk ngadalësohet.
Ajo shpjegon se shumë procese në trup, si energjia ditore, gjumi dhe mënyra si digjen kaloritë, varen nga ritmi cirkadian — ora jonë e brendshme natyrore — dhe darkat e vona mund ta prishin atë. Kjo mund të ndikojë në humor, lodhje dhe probleme gjumi. Për këtë arsye, Norton këshillon që darka të përfundohet idealisht midis 17:30 dhe 19:00, ose të paktën dy deri në tre orë para se të flemë.
Sigurisht, nuk është gjithmonë e lehtë për këdo, sidomos për ata që punojnë gjatë gjithë ditës ose e kanё punёn larg dhe u duhet tё udhёtojnё. Por edhe një përpjekje për ta afruar darkën disa orë më herët se zakonisht mund të bëjë ndryshim të madh në mënyrën si ndiheni gjatë dimrit.
(Burimi: Daily Mail)
