Turqia ka lëshuar urdhër-arresti ndërkombëtar ndaj kryeministrit izraelit Benjamin Netanyahu dhe disa zyrtarëve të lartë të Izraelit, duke i akuzuar për gjenocid dhe krime kundër njerëzimit gjatë luftës në Rripin e Gazës.
Sipas një deklarate të zyrës së prokurorit të Stambollit të bërë publike të premten, në listën e 37 të dyshuarve përfshihen edhe ministri i Mbrojtjes, Israel Katz, ministri i Sigurisë Kombëtare, Itamar Ben-Gvir, dhe shefi i shtabit të ushtrisë, gjenerali Eyal Zamir, ndër të tjerë. Prokuroria nuk ka publikuar të gjithë emrat, por ka bërë të ditur se ndaj tyre janë ngritur akuza për “gjenocid sistematik dhe krime kundër njerëzimit” ndaj popullsisë palestineze që prej tetorit të vitit 2023.
Në deklaratë përmenden disa prej sulmeve më të rënda që kanë tronditur opinionin ndërkombëtar, përfshirë bombardimin e spitalit Al-Ahli Baptist më 17 tetor 2023, ku humbën jetën rreth 500 persona, si dhe shkatërrimin e pajisjeve mjekësore nga forcat izraelite më 29 shkurt 2024. Po ashtu, dokumenti përmend bllokadën totale të Gazës, ndalimin e ndihmave humanitare dhe bombardimin e Spitalit të Miqësisë Turko-Palestineze në mars të këtij viti.
Në reagim, Izraeli e ka quajtur vendimin “një manovër propagandistike” të presidentit turk Rexhep Taip Erdogan. Ministri i Jashtëm izraelit Gideon Saar deklaroi në rrjetin X se “Izraeli e refuzon me përbuzje këtë shfaqje politike të diktatorit Erdogan”.
Ndërkohë, lëvizja palestineze Hamas ka përshëndetur vendimin e Ankarasë, duke e cilësuar si “një hap të lavdërueshëm që tregon përkushtimin e popullit dhe udhëheqjes turke ndaj drejtësisë, njerëzimit dhe vëllazërisë me popullin e shtypur palestinez.”
Ky zhvillim vjen pothuajse një vit pas vendimit të Gjykatës Penale Ndërkombëtare (ICC) për të lëshuar urdhër-arreste ndaj Netanyahut dhe ish-ministrit të mbrojtjes Yoav Gallant për “krime lufte” në Gaza. Turqia, nga ana e saj, është bashkuar vitin e kaluar me padinë e Afrikës së Jugut në Gjykatën Ndërkombëtare të Drejtësisë (ICJ), që akuzon Izraelin për gjenocid.
Sipas të dhënave të fundit, fushata ushtarake izraelite në Gaza ka shkaktuar të paktën 68,875 të vrarë dhe 170,679 të plagosur që prej tetorit 2023, ndërsa mijëra të tjerë rezultojnë ende të zhdukur nën rrënoja.
Turqia ka bërë të ditur se do t’i kërkojë Interpol-it të bashkëpunojë në ekzekutimin e urdhër-arresteve, ndërsa e ka cilësuar këtë hap si “një detyrim ligjor dhe moral ndaj popullit palestinez”.
(Burimi: Aljazeera)
