A e keni parë filmin Dirty Dancing? Është historia e “Baby”-t, një vajze të re, optimiste dhe idealiste, e cila bie në dashuri me një instruktor vallëzimi gjatë pushimeve familjare. Por ajo që shumë pak njerëz e dinë është se kjo histori nuk ishte thjesht trillim.
Skenari u shkrua nga Eleanor “Baby” Bergstein dhe, ashtu si personazhi kryesor i filmit, edhe jeta e saj kishte shumë ngjashmëri me historinë në ekran. Babai i Eleanor-it ishte mjek dhe, si adoleshente, ajo i kalonte pushimet verore në Catskills, në Shtetet e Bashkuara. Pikërisht aty ajo u njoh me botën e vallëzimit dhe mësoi të “vallëzonte dirty” në Nju Jorkun e viteve ’50 – një pasion që më vonë do ta kthente në zemrën e filmit.
Eleanor vendosi të shkruante një film për muzikën dhe atmosferën që ajo dashuronte, por rruga drejt ekranit nuk ishte aspak e lehtë. Skenari i saj u refuzua vazhdimisht. Drejtuesit e studiove e quajtën një ide qesharake dhe të padenjë për t’u shndërruar në film.
“Kështu që unë ngjitesha mbi tavolina… dhe të gjithë këta burra me purot e tyre ktheheshin, uleshin dhe unë duhej të ‘vallëzoja dirty’ mbi tavolina për t`i bindur që ta bënin filmin,” ka treguar ajo më vonë.
Pas shumë këmbënguljeje, një kompani shpërndarjeje VHS pranoi ta realizonte projektin. Patrick Swayze u zgjodh për rolin e Johnny-t, ndërsa Jennifer Grey për rolin e Baby-t. Filmi u dërgua në kinema vetëm për një javë, me planin që më pas të dilte direkt në kaseta video.
Dirty Dancing trajtonte tema të forta për kohën: dallimet klasore, ligjet e abortit dhe të drejtat civile – tema për të cilat Eleanor këmbënguli të mos hiqeshin. Fatmirësisht për të, kompania nuk i kushtoi shumë vëmendje projektit.
“Ata mendonin se po bënin një mbeturinë mё tepёr… saqë as nuk e monitoruan,” ka thënë ajo.
Filmi u shfaq për herë të parë në kinema në vitin 1987, në një periudhë shumë të kufizuar. Eleanor vendosi të ulej në sallë çdo natë gjatë shfaqjeve – dhe atëherë ndodhi e papritura.
“Mendova se kisha shkuar në parajsë… Publiku filloi të kërkonte që filmi të shfaqej më gjatë,” kujton ajo.
Falë reagimit të jashtëzakonshëm të shikuesve, Dirty Dancing qëndroi në krye për 19 javë radhazi dhe fitoi mbi 200 milionë dollarë, duke u shndërruar në një fenomen global.
Shumëkush e pyet Eleanor-in nëse filmi është historia e jetës së saj. “Njerëzit thonë: ‘Kjo është historia jote?’ dhe unë nervozohem pak,” thotë ajo me humor. “Sigurisht, më thërrisnin ‘Baby’ deri në moshën 21-vjeçare…”
Ashtu si personazhi i Baby-t në film, edhe Eleanor Bergstein – sot 87 vjeç – u nënvlerësua dhe u shty në një qoshe për vite me radhë, derisa arriti t’u provonte të gjithëve se kishin gabuar. Një histori këmbënguljeje, pasioni dhe besimi te vetja, që u shndërrua në një nga filmat më të dashur të të gjitha kohërave.
(Burimi: BBC)
