Vdekja e gjyqtarit Benny Sagi dhe teoritë konspirative: faktet pas një tragjedie që u politizua
Vdekja tragjike e gjyqtarit Benny Sagi, një prej figurave më të respektuara të sistemit gjyqësor izraelit, ka hapur jo vetëm një kapitull zie për drejtësinë në Izrael, por edhe një valë dezinformimi online. Brenda pak orësh nga lajmi i aksidentit fatal, rrjetet sociale u mbushën me pretendime që e lidhën vdekjen e tij me gjyqin për korrupsion ndaj kryeministrit Benjamin Netanyahu, duke ushqyer teori konspirative.
Një aksident tragjik në Route 6
Gjyqtari Benny Sagi, 54 vjeç, president i Gjykatës së Qarkut Beersheba, humbi jetën mbrëmjen e së dielës, më 4 janar 2026, në një aksident të rëndë trafiku në autostradën Route 6. Sipas policisë izraelite, një automjet që po lëvizte jashtë rruge doli papritur në autostradë dhe u përplas me motorin e Sagi-t.
Ekipet e emergjencës mbërritën shpejt në vendngjarje, por e gjetën gjyqtarin me plagë të shumta dhe pa shenja jete. Ai u shpall i vdekur në vend. Paramjekët e përshkruan aksidentin si “shokues”, ndërsa policia bëri të ditur se, në këtë fazë, nuk ka asnjë indicie për sabotim apo akt kriminal. Hetimet për rrethanat e plota të përplasjes vijojnë sipas procedurave standarde për aksidentet rrugore fatale.
Si lindi narrativa e rreme
Menjëherë pas konfirmimit të vdekjes, në rrjete sociale – veçanërisht në platforma ku qarkullojnë narrativa politike të polarizuara – u shfaqën pretendime se Benny Sagi ishte gjyqtari kryesor që po mbikëqyrte gjyqin për korrupsion ndaj kryeministrit Benjamin Netanyahu. Në vazhdim, këto pretendime u shndërruan në insinuata se vdekja e tij ishte “e dyshimtë” dhe e lidhur me çështjet penale të ngritura ndaj kryeministrit.
Verifikimi i fakteve tregon qartë se kjo narrativë është plotësisht e pavërtetë.
Faktet zyrtare: Sagi nuk ishte pjesë e gjyqit të Netanyahu-t
Procesi gjyqësor ndaj Benjamin Netanyahut për çështjet e njohura si Dosjet 1000, 2000 dhe 4000 zhvillohet në Gjykatën e Qarkut të Jerusalemit dhe drejtohet nga një trupë prej tre gjyqtarësh: Rivka Friedman-Feldman (kryesuese), Moshe Bar-Am dhe Oded Shoham.
Benny Sagi nuk ishte pjesë e kësaj trupe dhe nuk kishte asnjë rol në gjykimin e çështjeve penale ndaj kryeministrit. Ai shërbente në një gjykatë tjetër – atë të Beershebas – dhe kompetencat e tij nuk përfshinin dosjen e Netanyahut.
Lidhja e vetme, por periferike: “Afera e Nëndetëseve”
E vetmja pikë ku emri i Sagit prekte në mënyrë indirekte një çështje ku Netanyahu ishte përmendur, ishte e ashtuquajtura “Afera e Nëndetëseve” (Dosja 3000). Në këtë çështje, Netanyahu ishte marrë në pyetje nga autoritetet, por nuk ishte i pandehur.
Sagi po kryesonte një proces të veçantë brenda kësaj dosjeje, që lidhej me konsulentin mediatik Tzachi Lieber, dhe pritej të shpallte vendimin në shkurt 2026. Kjo çështje nuk kishte lidhje direkte me gjyqin kryesor të korrupsionit ndaj kryeministrit.
Kush ishte Benny Sagi?
Sipas të dhënave zyrtare të publikuara nga autoritetet gjyqësore izraelite, Benny Sagi kishte një karrierë të gjatë dhe të respektuar në drejtësi. I lindur në vitin 1971, ai shërbeu në ushtri nga viti 1989 deri në 1993, përpara se të përfundonte studimet për drejtësi.
Ai punoi në Zyrën e Prokurorit të Shtetit në Distriktin Qendror nga viti 2001 deri në 2007, për t’u emëruar më pas gjyqtar në Gjykatën e Shkallës së Parë në Tel Aviv. Në vitin 2013 u bë zëvendëskryetar i kësaj gjykate, ndërsa në vitin 2015 u emërua gjyqtar në Gjykatën e Qarkut të Tel Avivit.
Në qershor 2024 u komandua kryetar i Gjykatës së Qarkut Beersheba, ndërsa në prill 2025 e mori këtë post në mënyrë të përhershme. Përveç punës gjyqësore, Sagi ishte edhe lektor i së drejtës në disa universitete.
Reagime të forta nga institucionet
Vdekja e tij shkaktoi reagime të shumta nga figurat më të larta të shtetit. Presidenti i Izraelit, Isaac Herzog, u shpreh se ishte “i shokuar dhe i pikëlluar thellësisht”, duke e cilësuar Sagin si një jurist brilant, me ndershmëri të jashtëzakonshme dhe një njeri të përulur e të sjellshëm.
Presidenti i Gjykatës së Lartë, Isaac Amit, tha se sistemi gjyqësor kishte humbur “një lider, një mik dhe një gjyqtar jashtëzakonisht të talentuar”, ndërsa ministri i Drejtësisë, Yariv Levin, theksoi se Sagi kishte ndërtuar besim të gjerë publik dhe kishte transformuar Gjykatën e Beershebas gjatë mandatit të tij.
Autoriteti Gjyqësor izraelit deklaroi se vdekja e tij përbën “një humbje të madhe për drejtësinë”, duke nënvizuar se ai kishte shërbyer si gjyqtar për rreth 20 vjet.
Benny Sagi la pas bashkëshorten, një vajzë dhe dy djem, si dhe një trashëgimi profesionale që kolegët e tij e përshkruajnë si shembull të integritetit dhe përkushtimit ndaj drejtësisë.
(Burimi: The Sunday Gardian dhe The Times of Israel)
