Në një seancë me interes të lartë publik dhe mediatik, Gjykata Kushtetuese ka nisur procesin duke dëgjuar kërkesën e Presidentit Bajram Begaj për shpalljen e moskompetencës së saj në çështjen që lidhet me shkarkimin e kryebashkiakut të Tiranës, Erion Veliaj.
Në krahun e Presidencës, përfaqësuesja ligjore Eriola Shija kërkoi që Gjykata të shpallte moskompetencë, duke argumentuar se ajo nuk mund të shqyrtojë një vendim administrativ. Por momenti që tërhoqi vëmendjen e të pranishmëve ishte mënyra e paraqitjes së saj — Shija thjesht lexoi me ngathtësi argumentet e përgatitura nga Ilir Rusmali, pa u ngritur në këmbë para trupës gjykuese, një sjellje që nuk kaloi pa u vënë re dhe që u komentua si tregues i mungesës së njohjes me rregullat e protokollit të Gjykatës Kushtetuese.
Nga ana e qeverisë, përfaqësuesi i Kryeministrisë, Vangelt Duni, Irma Qosja dhe Herald Jonuzi, iu bashkuan kërkesës së Presidencës, duke mbrojtur me një fjali të njëjtin qëndrim për moskompetencën e gjykatës.
Ndërkohë, pala e Erion Veliajt, e përfaqësuar nga avokatët Ermal Yzeiraj, ish-pedagog dhe ish-drejtor në Kontrollin e Lartë të Shtetit, si dhe Alban Dokushi, ish-drejtor juridik i Bashkisë së Tiranës, argumentoi me qetësi dhe qartësi ligjore kompetencën e Gjykatës për të shqyrtuar vendimin e shkarkimit.
Prania e Dokushit, që i ka qëndruar afër Veliajt në periudha të vështira, u pa si një shenjë besnikërie në një moment kur shumë të tjerë janë distancuar prej tij.
Pas debateve fillestare, kryetarja e Gjykatës Kushtetuese, Holta Zaçaj, njoftoi tërheqjen e Gjykatës për vlerësimin e kërkesës së Presidentit.
Sot, në këtë fillim të një procesi që pritet të jetë i gjatë, më shumë se vendimi, ishte dinamika në sallë ajo që foli — një tablo e qartë e nervozizmit institucional, përgatitjes së palëve dhe heshtjes fillestare strategjike të Veliajt, i cili pritet të dëgjohet në vijim.
